Féachann na réigiúin agus na cathracha le páirt níos mó a ghlacadh i straitéisí ullmhachta agus athléimneachta sláinte an Aontais

Chuir ceannairí áitiúla agus réigiúnacha i bhfios go láidir go mbeidh cumas an Aontais Eorpaigh freagairt go héifeachtach d’éigeandálaí ag brath ar chomhordú níos dlúithe ar gach leibhéal rialachais. In dhá thuairim a glacadh d’aon toil le linn an tseisiúin iomlánaigh a bhí aige an 7 Bealtaine, leag Coiste Eorpach na Réigiún (CnaR) béim ar an ngá atá le hathléimneacht straitéiseach na hEorpa a threisiú trína áirithiú go mbeidh na cathracha agus na réigiúin rannpháirteach go hiomlán i ndearadh agus i gcur chun feidhme chreataí ullmhachta an Aontais.

Le linn phaindéim COVID-19 agus chogadh na Rúise i gcoinne na hÚcráine, cuireadh i dtábhacht an gá atá le hullmhacht agus slándáil straitéiseach an Aontais Eorpaigh i gcomhair géarchéimeanna a neartú. Sa chomhthéacs sin, ba dhíol sásaimh do na ceannairí réigiúnacha agus áitiúla Straitéis Stoc-Charntha an Aontais mar fhreagairt thráthúil ar rioscaí geopholaitiúla atá ag dul i méid, ach d’éiligh siad go mbeadh níos mó rannpháirtíochta i ndearadh agus i gcur chun feidhme aon straitéisí agus beart ullmhachta. D’iarr siad go mbeadh rannpháirtíocht i straitéisí trasteorann agus i líonra stoc-charntha an Aontais, chomh maith leis an Tascfhórsa um Ullmhacht Phoiblí-Phríobháideach.

Sa tuairim faoi stiúir János Ádám Karácsony (HU/ECR), Leas-Uachtarán Chomhairle Contae Pest Vármegye, d’athdhearbhaigh comhaltaí CnaR gur gá feabhas a chur ar an ullmhacht agus acmhainneacht na gcathracha agus na réigiún a neartú chun earraí agus seirbhísí riachtanacha a chur ar fáil tráth géarchéime. Áirítear ar na bearta atá beartaithe amhábhair, earraí agus bia a stoc-charnadh, spleáchais chriticiúla a shainaithint, borradh a chur faoi tháirgeadh Eorpach príomhtháirgí agus sásraí an mhargaidh aonair a threisiú.

Ina theannta sin, iarrtar sa tuairim ar an gCoimisiún Eorpach tacú leis an acmhainneacht thionsclaíoch san Eoraip – ón monaraíocht go dtí an dáileadh – chun an t-iomaíochas, an nuálaíocht agus an athléimneacht ábhartha fhoriomlán a neartú i gcoinne géarchéimeanna a bheidh ann amach anseo.

Sa chomhthéacs sin, chuir na comhaltaí i bhfios go láidir nach mór neartú ullmhacht na hEorpa i gcomhair géarchéimeanna a bheith fite fuaite le hathléimneacht an chórais sláinte a threisiú. Is oth leis an tuairim faoi stiúir Antonio Aurigemma (IT/ECR), Uachtarán Chomhairle Réigiúnach Lazio, go bhfuil na leibhéil réigiúnacha agus áitiúla in easnamh ó Straitéis Frithbheart Leighis an Choimisiúin Eorpaigh, ós rud é go ndéantar córais cúraim sláinte a dhílárú go suntasach in dhá thrian de Bhallstáit an Aontais.

D’áitigh na réigiúin agus na cathracha ar an gCoimisiún agus ar na Ballstáit ról iomlán a thabhairt do na réigiúin agus do na cathracha maidir le straitéisí ullmhachta sláinte a dhearadh, a chur chun feidhme agus a rialú, lena n-áirítear pleanáil trasteorann, bonneagar le haghaidh frithbhearta leighis, agus córais faireachais fuíolluisce. Ar deireadh, iarrtar sa tuairim ar institiúidí an Aontais infheistíocht fhadtéarmach leordhóthanach a áirithiú in athléimneacht na gcóras sláinte tríd an gcéad Chreat Airgeadais Ilbhliantúil (CAI) eile, agus cuirtear i dtábhacht go mbraitheann ullmhacht éifeachtach ar ghníomhaíocht chomhordaithe ar fud an Aontais, ar an leibhéal náisiúnta, ar an leibhéal réigiúnach agus ar an leibhéal áitiúil.

Sleachta

Rapóirtéir János Ádám Karácsony (HU/ECR), Leas-Uachtarán Chomhairle Contae Pest Vármegye: ‘Ní féidir caitheamh leis an ullmhacht a thuilleadh mar chleachtadh teicniúil nó réamhchúraim, ní mór í a thuiscint mar chuid dár n-acmhainneacht fhoriomlán slándála agus freagartha ar ghéarchéimeanna. Is mó seans go gcuirfidh straitéis stoc-charntha atá nasctha go dlúth le réaltachtaí críochacha tacaíocht thráthúil agus éifeachtach ar fáil.’

Rapóirtéir Antonio Aurigemma (IT/ECR), Uachtarán Chomhairle Réigiúnach Lazio: ‘Tá straitéis láidir frithbheart leighis ríthábhachtach do shlándáil agus d’athléimneacht na hEorpa. Ní mór dó ullmhacht a áirithiú ar fud an tslabhra iomláin — ó thaighde agus táirgeadh go lóistíocht agus imscaradh — agus a bheith inoiriúnaithe, díláraithe agus ailínithe le córais náisiúnta ag an am céanna.’

Cúlra

• Grianghraif agus físeáin ón Seisiún Iomlánach
• Lean cuntas na seirbhíse Preasa ar X.

Teagmháil:

Hélène Dressen
Teil: +32 471502795
Helene.dressen@cor.europa.eu