Wara sajf devastanti ta’ nirien fil-foresti, ir-reġjuni u l-bliet jappellaw għal azzjoni lokali aktar b’saħħitha

Il-Membri indirizzaw id-“Dritt ta’ Soġġorn”, il-futur tas-settur tar-ross u l-indikazzjonijiet ġeografiċi f’laqgħat ospitati mill-President ta’ Castilla-La Mancha Emiliano García-Page Sánchez.

Il-membri tal-Kummissjoni għar-Riżorsi Naturali (NAT) tal-Kumitat Ewropew tar-Reġjuni (KtR) iltaqgħu fl-1 u t-2 ta’ Ottubru f’Castilla-La Mancha, Spanja, biex jindirizzaw ir-riskju dejjem jikber ta’ nirien fil-foresti madwar l-Ewropa u jiddiskutu kif l-awtoritajiet lokali u reġjonali jistgħu jsaħħu l-prevenzjoni, it-tħejjija u r-reżiljenza.

In-nirien fil-foresti qed isiru aktar frekwenti, mifruxa u intensi madwar l-Ewropa, xprunati mit-tibdil fil-klima, mit-tibdil fl-użu tal-art u mill-attività tal-bniedem, li jikkawżaw sa 96 % tan-nirien fil-foresti fl-UE. Lil hinn mill-impatti ambjentali u ta’ emerġenza, dawn joħolqu riskji dejjem akbar għas-saħħa pubblika, għall-għajxien, għall-infrastruttura, għall-bijodiversità u għall-ekonomija tal-UE, u jikkawżaw madwar EUR 2,5 biljun fi ħsara ekonomika annwali. Matul is-sena 2026, intilfu aktar minn 670 000 ettaru ta’ art minħabba nirien fil-foresti.

L-abbozz ta’ opinjoni adottat matul il-laqgħa f’Toledo jitlob li l-ġestjoni tar-riskju tan-nirien fil-foresti tiġi adattata għall-kundizzjonijiet lokali u implimentata fl-aktar livell xieraq, bl-awtoritajiet lokali u reġjonali jaqdu rwol ċentrali fil-prevenzjoni, it-tħejjija, ir-rispons u l-irkupru. Matul id-diskussjoni, ir-reġjun ta’ Provence-Alpes-Côte-d’Azur fi Franza ppreżenta inizjattiva ġdida li tappella biex tiġi stabbilita koalizzjoni Ewropea ta’ reġjuni reżiljenti għan-nirien fil-foresti, bl-għan li tingħata spinta lill-kooperazzjoni fil-livell reġjonali u jiġi żgurat appoġġ adegwat mill-baġit tal-UE.

Ir-relatur Dimitrios Kafantaris (EL/PPE), Kunsillier Muniċipali ta’ Pulou – Nestoros, qal: “Is-suċċess ta’ politika Ewropea moderna u effettiva dwar in-nirien fil-foresti m’għandux jitkejjel biss permezz ta’ numri, strumenti jew mekkaniżmi. Dan għandu jitkejjel mid-diżastri li jirnexxilna nipprevjenu, li huma s-soċjetajiet li nagħmlu aktar sikuri u speċjalment bil-ħajja li nipproteġu. Għalhekk jeħtieġ li nimxu immedjatament minn “tifi tan-nar” għal “ġestjoni tal-periklu s-sena kollha”. Biex jinħoloq malajr mudell li jinvesti fiċ-ċiklu kollu - pparedness, r esponse u r ecovery - u jqiegħed il-komunitajiet lokali fiċ-ċentru."

Dritt ta' Soġġorn: L-Ewropa għaż-żoni rurali

Id-dibattitu pubbliku dwar l-inizjattiva tal-UE “Id-dritt li wieħed jibqa’ fit-territorju” esplora kif il-politiki tal-UE jistgħu jgħinu lin-nies jgħixu, jaħdmu u jirnexxu fil-postijiet li jsejħulhom darhom, filwaqt li jindirizzaw it-tnaqqis demografiku u l-iżbilanċi reġjonali. Id-diskussjoni ffukat b'mod partikolari fuq l-isfidi li qed jiffaċċjaw iż-żoni rurali u remoti, inkluż l-aċċess għas-servizzi pubbliċi, il-kura tas-saħħa u l-konnettività, kif ukoll it-tiġdid ġenerazzjonali fil-biedja u s-sajd. Il-membri enfasizzaw il-ħtieġa għal politiki kkoordinati tal-UE biex jinħolqu l-kundizzjonijiet għan-nies biex jibqgħu, jirritornaw jew jibnu l-futur tagħhom fil-komunitajiet lokali tagħhom, f’konformità mad-Dikjarazzjoni ta’ Mullingar adottata mill-Bureau tal-KtR fit-23 ta’ Settembru.

Il-President tal-Kummissjoni NAT, Piotr Całbecki (PL/PPE), President tar-Reġjun ta’ Kujawsko-Pomorskie, qal: “It-tnaqqis fl-għadd ta’ bdiewa attivi fl-UE juri l-ħtieġa għal politiki territorjali b’saħħithom u appoġġ immirat għaż-żoni u l-komunitajiet rurali. Nistenna li r-Rapport tal-2026 dwar l-Istat tar-Reġjuni, li għandu jiġi ppreżentat mill-President tal-KtR fis-sessjoni plenarja ta’ Ottubru, jenfasizza l-iżvilupp rurali u t-tiġdid ġenerazzjonali fl-agrikoltura bħala prijoritajiet ewlenin. Irridu nkomplu naħdmu mill-qrib mal-gvernijiet nazzjonali tagħna biex niżguraw li r-rwol tar-reġjuni jiġi rikonoxxut b’mod ċar u ssalvagwardjat legalment fl-ipprogrammar finanzjarju pluriennali li jmiss.”

Waqt li kien qed jospita l-laqgħa, Emiliano García-Page Sánchez (ES/PSE), President ta’ Castilla-La Mancha, qal: “F’Castilla-La Mancha, ittestjajna b’suċċess leġiżlazzjoni li tipproteġi d-dritt li wieħed jibqa’ fit-territorju billi tiggarantixxi s-servizzi pubbliċi u l-infrastruttura. Mhux biss qed taħdem iżda qed tattira wkoll residenti ġodda. Problema li spiss titqajjem hija waħda ta’ sostenibbiltà: jista’ jkun diffiċli li jiġu sostnuti s-servizzi pubbliċi fejn jgħixu ftit nies. Iżda għandna nħarsu wkoll lejn is-sostenibbiltà minn perspettiva oħra. Bħala soċjetà, dak li huwa verament insostenibbli qed jonqos milli jippromwovi l-bilanċ territorjali. Approċċ aktar ibbilanċjat ifisser servizzi aħjar, mogħtija b’mod aktar effettiv.”

Il-futur tas-settur tar-ross fl-Ewropa

Is-settur Ewropew tar-ross qed jiffaċċja pressjonijiet agronomiċi, ekonomiċi u kummerċjali dejjem akbar li jheddu l-vijabbiltà tiegħu u l-ekonomiji rurali li jiddependu minnu. Ikkonċentrata f’reġjuni speċifiċi, il-produzzjoni tar-ross hija importanti għall-impjiegi, il-ġestjoni ambjentali, il-bijodiversità u l-wirt kulturali kif ukoll għas-sigurtà tal-ikel Ewropea. L-abbozz ta’ opinjoni adottat matul il-laqgħa jappella biex il-politiki tal-UE, inklużi l-Politika Agrikola Komuni u l-oqfsa kummerċjali u ambjentali, jappoġġjaw aħjar ir-reżiljenza, is-sostenibbiltà u l-kompetittività tar-reġjuni li jipproduċu r-ross.

Ir-relatur Alberto Cirio (IT/PPE), President tar-Reġjun tal-Piemonte, qal: “Is-settur tar-ross tal-Ewropa huwa strateġiku għall-ekonomiji reġjonali u lokali, għas-sigurtà tal-ikel u għar-reżiljenza ambjentali. L-Opinjoni tappella għal investiment aktar b’saħħtu fil-ġestjoni tal-ilma, l-innovazzjoni u l-biedja sostenibbli, flimkien ma’ regoli kummerċjali aktar ġusti u salvagwardji kontra t-tfixkil fis-suq. Tabilħaqq, l-UE trid tagħmel aktar biex tipproteġi lill-produtturi minn kompetizzjoni inġusta, b’mod partikolari mix-Xlokk tal-Asja. Ir-ross Ewropew mhuwiex komodità, iżda eċċellenza li għandha tiġi ssalvagwardjata fil-varjetajiet u l-karatteristiċi tiegħu: ta’ kwalità, favur l-ambjent u prodotti b’rispett għad-dinjità u d-drittijiet tal-ħaddiema. Il-kompetizzjoni inġusta tirriskja li tfaqqar lill-bdiewa Ewropej u twassalhom biex ifallu.”

L-indikazzjonijiet ġeografiċi u l-inbid bħala muturi tal-iżvilupp territorjali

Fl-ewwel jum tal-avveniment estern f’Castilla-La Mancha, il-membri tal-Kummissjoni NAT ipparteċipaw f’konferenza dwar “Il-protezzjoni tal-oriġini, il-ħolqien tal-valur: indikazzjonijiet ġeografiċi u nbid bħala muturi tal-iżvilupp territorjali”, segwita minn żjara fuq il-post tal-Cooperativa Virgen de las Viñas f’Tomelloso. Il-konferenza esplorat kif l-indikazzjonijiet ġeografiċi jipproteġu l-prodotti u jiggarantixxu l-istandards tal-kwalità.

Fil-livell Ewropew, l-indikazzjonijiet ġeografiċi jiġġeneraw aktar minn EUR 75 biljun f’bejgħ annwali u jammontaw għal 15,5 % tal-esportazzjonijiet agroalimentari tal-UE. Dawn jagħtu spinta lill-impjiegi lokali, isaħħu l-ktajjen tal-valur reġjonali u jinkoraġġixxu attivitajiet bħat-turiżmu u fl-aħħar mill-aħħar jikkontribwixxu għall-vitalità tal-komunitajiet rurali.

Aktar informazzjoni:

· Ritratti u filmati tal-avveniment.

Persuna ta' kuntatt:

Hélène Dressen
Tel: +32 471502795
Helene.dressen@cor.europa.eu

Lauri Ouvinen
Tel: +32 473536887
lauri.ouvinen@cor.europa.eu