Ciste Sóisialta níos láidre á éileamh ag na réigiúin agus na cathracha sa chéad bhuiséad eile de chuid an Aontais

Tá sé curtha in iúl ag Coiste Eorpach na Réigiún (CnaR) go bhfuil sé i gcoinne phleananna an Choimisiúin Eorpaigh Ciste Sóisialta na hEorpa (CSE) a chumasc le hionstraimí eile de chuid an Aontais laistigh de phleananna náisiúnta aonair, agus tá sé ag iarraidh go gcaomhnófaí é mar uirlis neamhspleách. D’iarr an Coiste freisin go méadófaí buiséad CSE, go dtí os cionn €124 bhilliún in 2028-34. 

Áiríodh an iarraidh sa tuairim a glacadh d’aon toil ag an seisiún iomlánach an 2 Iúil, arna dréachtú ag Tom Jungen (LU/PSE), méara Roeser.

D’áitigh ceannairí réigiúnacha agus áitiúla gur éigeandálaí sóisialta iad dídhaonrú na gceantar tuaithe, bochtaineacht fuinnimh, dífhostaíocht agus easpa dídine nach mór don Aontas Eorpach aghaidh a thabhairt orthu agus nach féidir leis an Aontas dul i ngleic leo go héifeachtach gan na hacmhainní airgeadais is gá. Ní leor an sprioc íosta 14 % don chaiteachas sóisialta atá beartaithe ag an gCoimisiún Eorpach ina thogra le haghaidh bhuiséad fadtéarmach an Aontais 2028-34, a dúirt siad, dá bhrí sin, d’iarr siad go gcaomhnófaí Ciste Sóisialta na hEorpa agus go mbeadh sé ar cheann de phríomhionstraimí airgeadais an Aontais, agus go méadófaí a bhuiséad seacht mbliana ón €100 billiún atá ann faoi láthair go dtí €124.19 billiún ar a laghad (praghsanna 2025).

Meastar go bhfuil 94.6 milliún duine, beirt as gach deichniúr saoránach den Aontas, ina gcónaí i dteaghlaigh atá i mbaol bochtaineachta nó eisiaimh shóisialta, nach bhfuil bunscileanna digiteacha ag 42 % de dhaonra an Aontais, agus go bhfuil oiliúint de dhíth ar níos mó ná 50 milliún oibrí. Chuir comhaltaí CnaR i bhfios go láidir go dtabharfadh CSE láidir na hacmhainní airgeadais is gá don Aontas chun dul i ngleic leis na dúshláin sin, chun cuspóirí Cholún Eorpach na gCeart Sóisialta a bhaint amach, chun infheistíocht a dhéanamh sa chomhtháthú sóisialta, chun bochtaineacht leanaí a chomhrac agus chun tacú le daoine óga poist a aimsiú.

Coimircí níos láidre i gcoinne na bochtaineachta

Tá leanbh amháin as gach ceathrar san Aontas i mbaol bochtaineachta nó eisiaimh shóisialta agus tá an ráta dífhostaíochta i measc na hóige beagnach 15%. D’áitigh na réigiúin agus na cathracha go gcruthaíonn na figiúirí rabhaidh sin gur gá an Ráthaíocht Eorpach do Leanaí agus an Ráthaíocht don Aos Óg a threisiú le buiséid thiomnaithe, táscairí áitbhunaithe agus rannpháirtíocht eagraíochtaí speisialaithe na sochaí sibhialta.

D’iarr comhaltaí CnaR go dtabharfaí ról ríthábhachtach do CSE sa chomhrac i gcoinne na bochtaineachta, agus, go háirithe, d’iarr siad go mbeadh coimircí níos láidre ann i gcoinne bochtaineacht leanaí. Ba cheart go n-áireofaí ar na gníomhaíochtaí i gcoinne na bochtaineachta an Treochlár um Poist ar Ardchaighdeán a mhol an Coimisiún Eorpach, le bearta atá bunaithe ar oideachas agus ar oiliúint agus ar phá cothrom agus cuibhiúil a chur chun cinn. Tá fíorchur chuige críochach maidir le hinfheistíocht shóisialta agus rannpháirtíocht fhóinteach na n-údarás áitiúil agus réigiúnach ríthábhachtach chun éifeachtacht CSE a ráthú.

Luaigh:

Rapóirtéir Tom Jungen (LU/PSE), méara Roeser: “Ní hé an cheist a thuilleadh an leanfaidh Ciste Sóisialta na hEorpa de bheith ann. Déanfaidh sé. Is í an fhíorcheist an leanfaidh sé de bheith ina ionstraim Eorpach láidir chosanta nó an mbeidh sé ina chuspóir caiteachais eile, in iomaíocht le go leor eile. Teastaíonn CSE infheicthe agus dea-mhaoinithe ón Eoraip a leanann d’infheistíocht a dhéanamh i scileanna, i bpoist ardcháilíochta, i mbochtaineacht leanaí agus i gcuimsiú sóisialta. Níl aon iomaíochas ann gan comhtháthú sóisialta.’

Tuilleadh eolais

• Físeáin agus grianghraif de sheisiún iomlánach CnaR.
• Tá an tuairim a glacadh mar chuid de shraith 20 tuairim a bhfuil CnaR ag obair orthu chun measúnú a dhéanamh ar ghnéithe agus rialacháin shonracha de bhuiséad fadtéarmach an Aontais a bheidh ann amach anseo 2028-34: treochlár na dtuairimí a sheiceáil.
• An 29 Meitheamh, tháinig Comhairle an Aontais Eorpaigh ar sheasamh caibidlíochta páirteach maidir le dhá phríomhrialachán ón mBeartas Comhtháthaithe do bhuiséad an Aontais 2028-2034, lena n-áirítear Ciste Sóisialta na hEorpa. Tuilleadh sonraí.

Teagmháil:

Matteo Miglietta
Teil: +32 470895382
Matteo.Miglietta@cor.europa.eu