Il-Pjan ta’ Azzjoni Ewropew dwar l-Enerġija mir-Riħ jeħtieġ li jkollu l-komunitajiet lokali abbord

Ir-reġjuni u l-bliet jappellaw lill-Kummissjoni Ewropea biex tiżgura parteċipazzjoni akbar taċ-ċittadini u tal-awtoritajiet lokali fl-implimentazzjoni tal-Pjan ta’ Azzjoni dwar l-Enerġija mir-Riħ peress li dawn jaqdu rwol essenzjali fit-trawwim tal-aċċettazzjoni pubblika għal proġetti tal-enerġija mir-riħ fil-livell lokali. L-Opinjoni adottata fid-9 ta’ Ottubru mill-Kumitat Ewropew tar-Reġjuni (KtR) tħeġġeġ ukoll l-appoġġ għall-ktajjen tal-provvista lokali u l-protezzjoni tal-industrija Ewropea tal-enerġija mir-riħ kontra kompetizzjoni inġusta.

Il-mexxejja lokali u reġjonali jqisu li jinsabu fl-aħjar pożizzjoni biex jiżguraw l-aċċettazzjoni pubblika għal proġetti tal-enerġija mir-riħ billi jinvolvu b’mod attiv liċ-ċittadini fil-komunitajiet tagħhom fl-istadju tal-ippjanar. L-Opinjoni abbozzata minn Andries Gryffroy (BE/AE), Membru tal-Parlament Fjamming, titlob lill-Kummissjoni Ewropea tiżviluppa “pjattaforma ta’ fiduċja” biex ittejjeb il-komunikazzjoni dwar il-ħolqien ta’ ktajjen tal-provvista lokali, impjiegi u gwadanji soċjetali oħra li jirriżultaw mill-industrija tal-enerġija rinnovabbli. Dan huwa meqjus kruċjali biex tiżdied l-aċċettazzjoni ġenerali u jiġu attirati persuni tas-sengħa lejn is-settur.

L-Opinjoni tissuġġerixxi li l-għoti ta’ aċċess għall-ġenerazzjoni tal-enerġija b’kundizzjonijiet vantaġġużi jista’ jkun mod kif jiġu kkumpensati kemm ir-residenti kif ukoll l-awtoritajiet lokali, u b’hekk jgħin biex jiġi indirizzat kwalunkwe effett fuq il-pajsaġġ jew tfixkil ieħor assoċjat mal-proġetti tal-enerġija eolika. Ir-reġjuni u l-bliet jenfasizzaw ukoll ir-rwol tal-kooperattivi u l-komunitajiet tal-enerġija fl-użu ta’ proġetti tal-enerġija mir-riħ fuq skala żgħira u b’konsum baxx tal-enerġija u fl-għoti ta’ redditu finanzjarju lill-komunitajiet lokali involuti.

Fl-istess ħin, il-mexxejja lokali u reġjonali jwissu kontra kundizzjonijiet mhux ekwi u jħeġġu l-appoġġ tal-ktajjen tal-provvista tal-enerġija mir-riħ Ewropej sabiex tissaħħaħ il-kompetittività tan-negozji tal-UE filwaqt li titnaqqas id-dipendenza minn pajjiżi terzi. Il-Kumitat jipproponi l-ħolqien ta’ tikketta “magħmul fl-Ewropa u mill-Ewropa” li tistabbilixxi l-obbligu ta’ kontenut minimu lokali fil-komponenti tat-turbini eoliċi. Barra minn hekk, il-mekkaniżmu ta’ aġġustament tal-karbonju fil-fruntiera għandu jiġi implimentat malajr kemm jista’ jkun, u l-aspetti ambjentali u soċjali għandhom jiġu inklużi fil-proċeduri tal-akkwist pubbliku u fil-proċessi tal-irkant.

Peress li l-kapaċità tal-grilja diġà qed tfixkel il-konnessjoni tal-enerġija eolika, hemm bżonn li tissaħħaħ l-infrastruttura kritika għall-ħżin, it-trasport u d-distribuzzjoni tal-enerġija, inklużi l-interkonnessjonijiet transfruntiera. Il-KtR iħeġġeġ lill-Kummissjoni Ewropea tiffaċilita l-bini tal-grilja bi pjan fit-tul għall-iżvilupp tal-grilja lokali, li jagħti prijorità lill-investimenti fl-infrastruttura tal-grilja u l-kooperazzjoni reġjonali.

Il-bliet u r-reġjuni jenfasizzaw ukoll ir-rwol tagħhom fil-proċess tal-permessi u l-ħtieġa li jiġu pprovduti bil-ħiliet u l-għodod meħtieġa biex jivvalutaw kwalunkwe kunflitt potenzjali mad-direttivi u r-regolamenti Ewropej, bħad-Direttiva dwar l-Għasafar u d-Direttiva dwar il-Ħabitats. Dan jista’ jgħin biex jittejbu l-effiċjenza u r-rata ta’ approvazzjoni tal-proċessi tal-permessi, filwaqt li jitqiesu l-istandards ambjentali, u biex jiġu armonizzati u minimizzati l-proċeduri ta’ litigazzjoni. 

Kwotazzjoni:

Rapporteur Andries Gryffroy BE/AE), Membru tal-Parlament Fjamming: “L-enerġija mir-riħ hija element ewlieni tat-taħlita tal-enerġija tal-UE biex jintlaħqu l-miri klimatiċi u l-indipendenza enerġetika. Madankollu, sabiex jiġu indirizzati l-ostakli u tiġi żgurata adozzjoni aktar rapida ta’ din it-teknoloġija, jeħtieġ li jsir aktar biex tittejjeb l-aċċettazzjoni mill-pubbliku ġenerali. Barra minn hekk, il-komunitajiet lokali jeħtieġ li jkunu involuti b’mod adegwat fl-iżvilupp ta’ proġetti tal-enerġija mir-riħ. L-UE teħtieġ aktar pjanijiet u investimenti fit-tul fil-ħżin tal-enerġija u fl-iżvilupp tal-grilja biex tittrasporta l-enerġija mill-punt tal-produzzjoni sal-punt tal-konsum, u tqis il-produzzjoni intermittenti tal-enerġija eolika. Il-proċess tal-għoti tal-permessi għandu jiġi ssimplifikat filwaqt li jitqiesu l-istandards ambjentali u l-kunflitti potenzjali ma’ direttivi u regolamenti Ewropej oħra għandhom jiġu solvuti permezz ta’ razzjonalizzazzjoni aħjar bejn id-direttivi.”

 Għal aktar informazzjoni:

 Biex taċċellera l-manifattura tal-enerġija eolika madwar l-Ewropa, il-Kummissjoni Ewropea ppreżentat il-Pakketttal-UE dwar l-EnerġijaEolika f’Ottubru 2023. Dan jikkonsisti f’żewġ inizjattivi – il-Pjan ta’ Azzjoni Ewropew dwar l-Enerġija mir-Riħ u komunikazzjoni dwar il-kisba tal-ambizzjonijiet tal-UE dwar l-enerġija mir-riħ lil hinn mill-kosta.

 Skont il-Eurostat , ir-riħ kien jammonta għal aktar minn terz (37,5 %) tal-elettriku totali ġġenerat minn sorsi rinnovabbli fl-UE fl-2022. Il-Kummissjoni Ewropea tistma li l-mira tal-UE ta’ mill-inqas 42,5 % ta’ enerġija rinnovabbli sal-2030, bil-għan li tilħaq 45 %, se tirrikjedi li l-kapaċità installata tikber minn 204 GW fl-2022 għal aktar minn 500 GW fl-2030.

 Skont ir-rapport tal-2023 dwar il-kompetittività ta’ Wind Europe, l-industrija tal-enerġija mir-riħ ipprovdiet madwar 300 000 impjieg fl-UE fl-2022. S’issa, il-manifatturi Ewropej kienu responsabbli għal 85 % tas-suq tal-enerġija mir-riħ tal-UE u għal 94 % fis-settur lil hinn mill-kosta.

Skeda informattiva dwar il-Pjan ta’ Azzjoni dwar l-Enerġija mir-Riħ

Persuna ta' kuntatt:

Lauri Ouvinen
Tel: +32 473536887
lauri.ouvinen@cor.europa.eu