It-titjib tas-sistemi ta’ mobbiltà fl-Ewropa jista’ jirnexxi biss jekk id-data dwar it-trasport tiġi kondiviża fil-livelli kollha, jgħidu l-mexxejja lokali

L-avvanz tad-data u l-mobbiltà huwa ta’ importanza kruċjali fit-tiswir tal-futur tat-trasport u l-loġistika. F’Opinjoni dwar l-Ispazju Ewropew tad-Data dwar il-Mobbiltà, adottata matul is-sessjoni plenarja tat-8 ta’ Ottubru, il-membri tal-Kumitat Ewropew tar-Reġjuni (KtR) appellaw għal kollaborazzjoni msaħħa fost il-fornituri tas-servizzi ta’ mobbiltà pubbliċi u privati fil-kondiviżjoni tas-sistemi tad-data biex jittejbu s-servizzi pubbliċi u tiġi ffaċilitata l-integrazzjoni bla xkiel tad-data dwar it-trasport f’modi u reġjuni ġeografiċi differenti. 

Il-membri tal-KtR enfasizzaw li t-trasport huwa fil-biċċa l-kbira ġestit mill-awtoritajiet lokali u reġjonali u li l-mobbiltà għandha impatt profond fuq il-ħajja ta’ kuljum taċ-ċittadini tal-UE. Sistema tat-trasport integrata u li tiffunzjona tajjeb hija vitali għas-Suq Uniku u għall-prosperità u l-kompetittività ġenerali tal-Ewropa. L-awtoritajiet lokali u reġjonali mhumiex biss responsabbli għas-servizzi tat-trasport, iżda wkoll għall-ġestjoni tal-użu tal-ispazju pubbliku, li huwa kritiku għall-modi kollha tat-trasport.  

Fl-Opinjoni, il-membri tal-KtR talbu aċċess miftuħ għad-data dwar it-trasport, li huwa essenzjali għall-awtoritajiet pubbliċi, l-operaturi tat-trasport tagħhom, il-fornituri privati ta’ servizzi ta’ mobbiltà u l-utenti individwali tat-trasport. 

Huma enfasizzaw li l-mobbiltà għadha organizzata f’silos ibbażati fuq modi tat-trasport, u ħafna mid-data meħtieġa għall-Ispazju Ewropew tad-Data dwar il-Mobbiltà tibqa’ maħżuna f’sistemi iżolati u mhux interoperabbli. Huma enfasizzaw ukoll il-ħtieġa li l-awtoritajiet lokali u reġjonali jkollhom aċċess għal data komprensiva li tiżvela x-xejriet tal-mobbiltà, li tippermetti tfassil infurmat tal-politika, ġestjoni tal-infrastruttura, u l-ħolqien ta’ sistema ta’ mobbiltà bla xkiel. Din is-sistema jenħtieġ li tipprovdi kundizzjonijiet ekwi fejn il-modi tat-trasport sostenibbli u t-trasport pubbliku jieħdu rwol ewlieni. 

Madankollu, il-kisba ta’ kundizzjonijiet ekwi hija mxekkla mid-diffikultà li jiġu ġestiti ammonti kbar ta’ data dwar it-trasport, iġġenerata kemm mill-operaturi pubbliċi kif ukoll minn dawk privati bħall-apps tal-ivvjaġġar, il-fornituri tal-mowbajls, u l-manifatturi tal-vetturi u li din id-data ssir interoperabbli. Approċċ deċentralizzat, fejn id-data tibqa’ f’idejn is-sidien iżda tkun aċċessibbli permezz ta’ sistema ta’ governanza komuni, għalhekk jiftaħ il-bieb għal soluzzjonijiet ta’ mobbiltà aktar flessibbli u parteċipazzjoni inklużiva minn fornituri ġodda ta’ servizzi. 

Kwotazzjoni:  

Relatur Zdeněk Hrib (CZ/Ħodor), l-Ewwel Viċi Sindku ta' Praga: “L-Ispazju Ewropew tad-Data dwar il-Mobbiltà se jagħti s-setgħa lill-bliet u lir-reġjuni biex jieħdu deċiżjonijiet aktar intelliġenti b’data reali, li jwassal għal trasport pubbliku aħjar, infrastruttura mtejba, u mobbiltà urbana aktar sostenibbli. L-implimentazzjoni b’suċċess ta’ dan il-kunċett se tkun kruċjali fit-tfassil mill-ġdid tax-xenarju ġenerali tal-mobbiltà tagħna.” 

Għal aktar informazzjoni:  

• L-ispazju komuni Ewropew tad-data dwar il-mobbiltà (EMDS) għandu l-għan li jiffaċilita l-aċċess, l-akkomunament u l-kondiviżjoni tad-data għal trasport aktar effiċjenti, sikur, sostenibbli u reżiljenti. Dan jibni fuq inizjattivi u applikazzjonijiet relatati mad-data dwar it-trasport u se jkun appoġġat minn inizjattivi biex tingħata spinta lill-interoperabbiltà, is-sigurtà, u d-disponibbiltà u l-forniment ta’ data u servizzi.