Ir-reġjuni u l-bliet iħeġġu baġit fit-tul tal-UE ambizzjuż għal wara l-2027 b’kapaċità mtejba għall-ġestjoni tal-kriżijiet

Il-baġit pluriennali ta’ wara l-2027 tal-Unjoni Ewropea jrid ikun aktar sempliċi, aktar flessibbli u mibni fuq il-ħtiġijiet tal-komunitajiet lokali, li jistgħu jiżguraw li l-investimenti jippromovu b’mod effettiv il-koeżjoni fit-territorji kollha. Dawn huma l-proposti ewlenin inklużi f’Opinjoni adottata fis-sessjoni plenarja tal-Kumitat Ewropew tar-Reġjuni (KtR) fl-20 ta’ Novembru. L-Opinjoni, abbozzata minn Marie-Antoinette Maupertuis, President tal-Assemblea ta’ Korsika, stabbiliet l-ewwel pożizzjoni tal-KtR qabel il-preżentazzjoni tal-proposta għal baġit fit-tul tal-UE għal wara l-2027 mill-Kummissjoni Ewropea. 

L-għargħar fatali reċenti fi Spanja huwa l-aħħar tfakkira li d-diżastri klimatiċi qed jolqtu lit-territorji Ewropej dejjem aktar ta’ spiss. Il-baġit fit-tul tal-UE jrid jadatta għal din ir-realtà l-ġdida, billi jagħti lill-awtoritajiet nazzjonali u reġjonali l-appoġġ meħtieġ matul il-kriżi, filwaqt li jippreserva l-investimenti fit-tul fil-koeżjoni soċjali u territorjali. 

Għalhekk, il-KtR appella għal baġit tal-UE wara l-2027 li jinkludi fond ta’ emerġenza estiż jew riżerva ta’ flessibbiltà ġenerali. Dan jevita, kif ġara diversi drabi fil-passat, li l-Kummissjoni Ewropea tiddependi fuq riallokazzjoni ripetuta u programmazzjoni mill-ġdid minn fondi eżistenti bħall-Politika ta’ Koeżjoni biex tiffinanzja sfidi emerġenti jew emerġenzi mhux previsti. It-talba hija enfasizzata aktar f’riżoluzzjoni urġenti li għandha tiġi adottata fil-21 ta’ Novembru fil-Plenarja tal-KtR.

Il-mexxejja lokali u reġjonali wiegħdu baġit tal-UE li jkun aktar sempliċi u aktar aġli, li jnaqqas il-multiplikazzjoni ta’ fondi li jsegwu l-istess objettivi u li jiffaċilita l-użu tar-riżorsi. Din is-simplifikazzjoni għandha ssir filwaqt li jiġi rikonoxxut li l-Politika ta’ Koeżjoni waħedha mhijiex biżżejjed biex jiġu miġġielda d-disparitajiet territorjali. Il-baġit kollu tal-UE għandu jsaħħaħ il-koeżjoni ekonomika, soċjali u territorjali fl-Ewropa, u b’hekk jikkonforma mal-hekk imsejjaħ prinċipju “la tagħmilx ħsara lill-koeżjoni”. 

Il-baġit fit-tul il-ġdid għandu jkun ibbażat fuq objettivi ta’ politika ċari u jiżgura li l-awtoritajiet lokali u reġjonali jkunu involuti fil-proċess tat-teħid tad-deċiżjonijiet permezz ta’ tnaqqis fil-burokrazija u l-hekk imsejħa sussidjarjetà attiva, il-prinċipju tas-sħubija u l-governanza f’diversi livelli.

Oppożizzjoni għal programmi tal-UE aktar ċentralizzati

Ir-reġjuni u l-bliet opponew bil-qawwa ż-żieda fiċ-ċentralizzazzjoni tal-programmi ta’ finanzjament tal-UE, bħall-Politika Agrikola Komuni, li wasslet għal żieda fil-piż amministrattiv għall-awtoritajiet ta’ ġestjoni reġjonali u nuqqas ta’ flessibbiltà biex il-politika tiġi adattata għall-ħtiġijiet reġjonali. Strumenti ġodda bħall-Faċilità għall-Irkupru u r-Reżiljenza wara l-pandemija tal-COVID-19 ma jistgħux jitqiesu awtomatikament bħala l-aħjar mudell f’termini ta’ governanza tal-programmi pluriennali tal-UE wara l-2027. 

Kif rikonoxxut ukoll minn diversi kummissarji maħtura matul is-seduti ta’ smigħ tagħhom, in-nuqqas ta’ involviment tal-bliet u r-reġjuni fit-tħejjija u l-implimentazzjoni tal-Pjani Nazzjonali għall-Irkupru u r-Reżiljenza ma għandux jiġi replikat. Bl-istess mod, se jkun strumentali li jiġi żgurat li l-Fond għall-Kompetittività li jmiss jindirizza l-ispeċifiċitajiet territorjali. 

Il-korapporteurstal-Parlament Ewropewgħall-baġit fit-tul tal-UE wara l-2027, Siegfried Mureșan (RO/PPE) u Carla Tavares (PT/S&D), tkellmu matul id-dibattitu plenarju qabel il-votazzjoni dwar l-Opinjoni. Il-KtR jinsab lest li jappoġġja l-isforzi rikorrenti tal-Parlament Ewropew biex in-negozjati dwar il-baġit ta’ wara l-2027 isiru aktar demokratiċi u jiddispjaċih ħafna dwar in-nuqqas ta’ djalogu strutturat mal-gvernijiet lokali u reġjonali, kif ukoll mas-soċjetà ċivili, dwar dan is-suġġett. 

Kwotazzjoni 

Relatur Marie-Antoinette MAUPERTUIS (FR/AE), President tal-assemblea reġjonali ta’ Korsika: “Il-Baġittal-UE huwa l-għodda ewlenija biex id-“dritt li tibqa’” jsir realtà, filwaqt li jiżgura li kemm jekk ġej minn gżira kif ukoll minn belt, għandek il-libertà li tagħżel fejn tgħix fil-futur. Peress li huwa l-akbar programm ta’ investiment fid-dinja, dan mhux biss għandu jiffaċilita l-moviment ta’ persuni, oġġetti u servizzi madwar l-UE iżda għandu jagħti wkoll is-setgħa lill-komunitajiet lokali. Ir-reġjuni u l-bliet għandhom ikunu involuti bis-sħiħ fil-proċess tat-teħid tad-deċiżjonijiet, b’aċċess aktar faċli għall-finanzjament u inqas burokrazija. Qed nipproponu miżuri biex nissimplifikaw il-baġit, nevitaw id-duplikazzjonijiet u niżguraw li kull euro jilħaq il-komunitajiet li għandu l-għan li jappoġġa. Il-koeżjoni u s-sussidjarjetà attiva għandhom jibqgħu fil-qalba tal-investimenti tal-UE.”

Aktar informazzjoni

· Il-baġit fit-tul attwali tal-Unjoni Ewropea, magħruf bħala l-Qafas Finanzjarju Pluriennali (QFP), jiswa madwar EUR 1.2 triljun u jkopri l-perjodu mill-2024 sal-2027. Il-Kummissjoni Ewropea mistennija tippreżenta l-proposta tagħha għall-baġit fit-tul tal-UE ta’ wara l-2027 sal-1 ta’ Lulju 2025.

· Fl-14 ta' Ottubru, is-Sinjura Maupertuis ippreżentat l-opinjoni tal-KtR lill-membri tal-Kumitat għall-Baġit tal-Parlament Ewropew. Erġa' ara l-laqgħa (minn min. fil-17.00).

· Fil-21 ta’ Novembru, il-Kumitat Ewropew tar-Reġjuni se jivvota dwar l-Opinjoni “Politika ta’ Koeżjonimġeddawara l-2027 li ma tħalli lil ħadd jibqa’lura”, abbozzata mill-korelaturiVasco Alves Cordeiro (PT/PSE), President tal-KtR, uEmil Boc (RO/PPE), President tal-Kummissjoni tal-KtR għall-Politika ta’ Koeżjoni Territorjali u l-Baġit tal-UE.