Stqarrija tal-President tal-Kumitat Ewropew tar-Reġjuni dwar il-Kulleġġ il-ġdid tal-Kummissarji

“F’isem il-Kumitat Ewropew tar-Reġjuni, nixtieq nifraħ lill-membri tal-Kulleġġ tal-Kummissarji l-ġdid, għall-ħatra tagħhom illum mill-Parlament Ewropew, u nikkonferma mill-ġdid ir-rieda qawwija tagħna li naħdmu flimkien għal Unjoni Ewropea aktar b’saħħitha u aktar ġusta.

“L-involviment sħiħ tal-awtoritajiet lokali u reġjonali se jkun essenzjali biex jitwettqu l-isfidi ewlenin li qed tiffaċċja l-Unjoni tagħna, bħall-kriżi klimatika, l-aċċess għall-akkomodazzjoni, it-tħejjija għat-tkabbir, u ħafna aktar. Nilqgħu l-fatt li dan il-Kulleġġ jista’ jserraħ fuq diversi membri li kellhom l-opportunità li jmexxu l-bliet u r-reġjuni tagħhom kif ukoll li jservu bħala membri tal-Kumitat Ewropew tar-Reġjuni. Is-setgħa li jitwettqu dawn l-isfidi tinsab f’idejn l-awtoritajiet lokali u reġjonali madwar l-Ewropa, peress li jimplimentaw aktar minn 70 % tal-leġiżlazzjoni tal-UE u huma responsabbli għal nofs in-nefqa pubblika fl-UE. Biex ikomplu jagħmlu dan, ir-reġjuni u l-bliet se jkollhom bżonn politika ta’ koeżjoni aktar b’saħħitha u mġedda, mibnija mar-reġjuni kollha, permezz tal-ispirtu ta’ sħubija, ġestjoni kondiviża, governanza f’diversi livelli u approċċ ibbażat fuq il-post. Għalhekk, aħna nserrħu fuq l-impenn tal-Viċi President Eżekuttiv il-ġdid għall-koeżjoni u r-riformi biex naħdmu id f’id mal-Kumitat Ewropew tar-Reġjuni biex inressqu proposta ambizzjuża għall-politika ta’ koeżjoni.

“Se naħdmu bħala msieħeb leali u kostruttiv mal-Kummissjoni Ewropea, biex niżguraw li r-reġjuni u l-bliet jingħataw “l-importanza politika li jistħoqqilhom”, kif iddikjarat mill-President von der Leyen, speċjalment fid-dawl tal-qafas finanzjarju pluriennali li jmiss.”