Ní mór an t-iomaíochas agus an t-aistriú glas a bheith fite fuaite ina chéile, cuireann an mheitheal um an gComhaontú Glas ar an Leibhéal Áitiúil i bhfios go láidir

Thionóil meitheal CnaR um an gComhaontú Glas ar an Leibhéal Áitiúil an cruinniú deireanach a bhí aici den sainordú reatha an 5 Nollaig. Rinne na comhaltaí a marana ar a bhfuil bainte amach ag an meitheal agus mhalartaigh siad tuairimí leis an gCoimisiún Eorpach maidir leis an gcéad chéim eile den Chomhaontú Glas don Eoraip i dtéarma reachtach nua an Aontais.

Ó cruthaíodh í in 2020, tá an mheitheal um an gComhaontú Glas ar an Leibhéal Áitiúil gníomhach i ngach réimse beartais a bhaineann leis an gComhaontú Glas don Eoraip — ón aistriú fuinnimh go dtí an tsoghluaisteacht inbhuanaithe, ón uaillmhian aeráide go dtí an earnáil agraibhia inbhuanaithe, ón truailliú nialasach go dtí an geilleagar ciorclach — chun guth na gcathracha agus na réigiún a thabhairt isteach agus chun tuairisc a thabhairt ar na dúshláin agus na deiseanna a bhaineann le cur chun feidhme thionscnaimh an Chomhaontaithe Ghlais ar an leibhéal áitiúil agus réigiúnach.  Chinn comhaltaí na meithle gur cheart leanúint den obair sin sa chéad téarma oifige 5 bliana eile de Choiste na Réigiún a thosóidh i mí Feabhra 2025.

Agus tús curtha ag an gCoimisiún Eorpach nua lena théarma oifige nua an tseachtain seo caite, phléigh comhaltaí na meithle ‘An Comhaontú Glas ar an Leibhéal Áitiúil’ na chéad chéimeanna eile den Chomhaontú Glas le hionadaithe ó sheirbhísí éagsúla de chuid an Choimisiúin (AS COMP, AS ENV agus AS ENER). Chuir na cainteoirí in iúl go ndíreofar anois ar chur chun feidhme na dtionscnamh reachtach éagsúil a glacadh cheana féin, agus chuir siad i bhfios go láidir nach mór an t-aistriú glas a nascadh le hiomaíochas eacnamaíoch an Aontais agus le folláine na saoránach.

Seo mar a labhair cathaoirleach an chruinnithe Kata TÜTTŐ (HU/PSE), an Chéad Leas-Chathaoirleach ar Choimisiún ENVE agus comhairleoir cathrach Bhúdaipeist: ‘I gcomhréir le príomhphointí thuarascáil an Chomhaontaithe Ghlais 2.0, leanfaidh beartais ghlasa de ról lárnach a bheith acu i dtéarma oifige nua an Aontais chun comhtháthú críochach, eacnamaíoch agus sóisialta an Aontais a áirithiú agus chun tionchar diúltach géarchéimeanna aeráide agus comhshaoil ar ghníomhaíochtaí sláinte agus eacnamaíocha daoine a theorannú. Dheimhnigh an Coimisiún Eorpach nua go leanfaidh an tAontas de bheith ar thús cadhnaíochta maidir leis na cuspóirí agus na spriocanna a leagtar amach sa Chomhaontú Glas don Eoraip, a ceapadh mar straitéis fáis againn agus atá lárnach dár mbeartas tionsclaíoch nua, dár n-iomaíochas agus dár slándáil. Ní éireoidh lenár gconair i dtreo na haeráidneodrachta ach amháin le gné láidir shóisialta lena gcuimsítear riachtanais ár bpobal, ár gcuideachtaí agus ár gcríoch’.

Díríodh sa dara díospóireacht ar ról chistí an Aontais maidir le dlús a chur leis an aistriú glas ar an leibhéal áitiúil agus réigiúnach, agus ionadaithe ó AS REGIO, AS BUDG agus AS ECFIN i láthair. Caitheadh breis agus aon trian de bhuiséad an Aontais agus de chistí NextGenerationEU ar thionscnaimh a bhaineann leis an aeráid, agus is ón tSaoráid Téarnaimh agus Athléimneachta, ón gcomhbheartas talmhaíochta agus ón mbeartas comhtháthaithe a tháinig an chuid is mó den chistiú. Idir an dá linn, tá sé léirithe go bhfuil sé deacair an sprioc 10 % a bhaint amach maidir le cistiú ón Aontas chun tacú leis an mbithéagsúlacht. 

Thug comhaltaí na meithle um an gComhaontú Glas ar an Leibhéal Áitiúil rabhadh i gcoinne an tsimplithe as a dtiocfaidh athlárú; mhol siad go láidir go leanfadh samhail na bainistíochta comhroinnte, an rialachas il-leibhéil agus prionsabal na comhpháirtíochta de bheith ina dtreoirphrionsabail don bheartas comhtháthaithe agus d’aon bheartas infheistíochta a bheidh ann amach anseo. Leag siad béim ar an ngá atá le tuilleadh infheistíochta príobháidí a shlógadh, mar thoradh ar na moltaí a rinneadh sa tuairim ó Choiste Eorpach na Réigiún le déanaí maidir le todhchaí bheartas aeráide an Aontais.

“Ní hamháin go mbaineann an Comhaontú Glas leis an aeráid agus leis an dúlra, tá sé ríthábhachtach do thionscal, do shlándáil agus d’fholláine an Aontais. Tá ról le himirt ag gach earnáil. Tá gá le claochlú córasach, ina bhféachaimid ar na gnéithe is ríthábhachtaí ar gá dlús a chur leo sa chur chun feidhme, lena gcumhdaítear na gníomhaíochtaí uile is féidir linn a dhéanamh i réigiúin agus i gcathracha", a dúirt an rapóirtéir Markku MARKKULA (FI/PPE), Uachtarán Réigiún Heilsincí.

• Féach arís ar an gcruinniú
• Gailearaí na ngrianghraf (Flickr)