Il-kompetittività u t-tranżizzjoni ekoloġika jeħtieġ li jimxu id f’id, jenfasizza l-grupp ta’ ħidma dwar il-Patt Ekoloġiku fil-Livell Lokali

Il-Grupp ta’ Ħidma tal-KtR dwar il-Patt Ekoloġiku fil-Livell Lokali kellu l-aħħar laqgħa tiegħu tal-mandat attwali fil-5 ta’ Diċembru. Il-membri evalwaw il-kisbiet tal-grupp ta’ ħidma u kellhom skambju ta’ fehmiet mal-Kummissjoni Ewropea dwar il-fażi li jmiss tal-Patt Ekoloġiku Ewropew fil-leġiżlatura l-ġdida tal-UE.

Sa mill-ħolqien tiegħu fl-2020, il-Grupp ta’ Ħidma dwar il-Patt Ekoloġiku fil-Livell Lokali kien attiv fl-oqsma kollha ta’ politika marbuta mal-Patt Ekoloġiku Ewropew – mit-tranżizzjoni tal-enerġija għall-mobbiltà sostenibbli, mill-ambizzjoni klimatika għas-settur agroalimentari sostenibbli, minn tniġġis żero għall-ekonomija ċirkolari – biex iwassal leħen il-bliet u r-reġjuni u jirrapporta dwar l-isfidi u l-opportunitajiet marbuta mal-implimentazzjoni tal-inizjattivi tal-Patt Ekoloġiku fil-livell lokali u reġjonali.  Il-membri tal-grupp ta’ ħidma kkonkludew li din il-ħidma għandha tkompli fil-mandat ta’ ħames snin li jmiss tal-KtR li jibda fi Frar 2025.

Peress li l-Kummissjoni Ewropea l-ġdida bdiet il-mandat il-ġdid tagħha l-ġimgħa li għaddiet, il-membri tal-grupp ta’ ħidma dwar il-Patt Ekoloġiku fil-Livell Lokali ddiskutew ma’ rappreżentanti minn servizzi differenti tal-KE (DĠ COMP, DĠ ENV u DĠ ENER) dwar il-passi li jmiss tal-Patt Ekoloġiku. Il-kelliema indikaw li l-enfasi issa se tkun fuq l-implimentazzjoni tal-inizjattivi leġiżlattivi differenti diġà adottati, u ssottolinjaw li t-tranżizzjoni ekoloġika trid tkun marbuta mal-kompetittività ekonomika tal-UE u l-benesseri taċ-ċittadini.

Il-President tal-laqgħa Kata TÜTTŐ (HU/PSE), l-Ewwel Viċi President tal-Kummissjoni ENVE u Kunsillier tal-Belt ta’ Budapest, qalet: “F’konformità mal-punti ewlenin tar-rapport tagħna dwar il-Patt Ekoloġiku 2.0, fil-mandat il-ġdid tal-UE, il-politiki ekoloġiċi se jkomplu jaqdu rwol ċentrali biex jiżguraw il-koeżjoni territorjali, ekonomika u soċjali tal-UE u jillimitaw l-effett negattiv tal-kriżijiet klimatiċi u ambjentali fuq l-attivitajiet ekonomiċi u tas-saħħa tan-nies. Il-Kummissjoni Ewropea l-ġdida kkonfermat li l-UE se tibqa’ fit-triq lejn l-għanijiet u l-miri stabbiliti fil-Patt Ekoloġiku Ewropew, imfassla bħala l-istrateġija tagħna għat-tkabbir u ċentrali għall-politika industrijali l-ġdida tagħna, il-kompetittività u s-sigurtà. It-triq tagħna lejn in-newtralità klimatika se tirnexxi biss b’dimensjoni soċjali b’saħħitha li tħaddan il-ħtiġijiet tal-komunitajiet, il-kumpaniji u t-territorji tagħna”.

It-tieni dibattitu ffoka fuq ir-rwol tal-fondi tal-UE fl-aċċellerazzjoni tat-tranżizzjoni ekoloġika fil-livell lokali u reġjonali, bil-preżenza ta’ rappreżentanti mid-DĠ REGIO, id-DĠ BUDG u d-DĠ ECFIN. Aktar minn terz tal-baġit tal-UE u l-fondi tan-NextGenerationEU ntefqu fuq inizjattivi relatati mal-klima, bil-biċċa l-kbira tal-finanzjament ġej mill-Faċilità għall-Irkupru u r-Reżiljenza, il-politika agrikola komuni u l-politika ta’ koeżjoni. Sadanittant, il-mira ta’ 10 % għall-finanzjament tal-UE li jappoġġa l-bijodiversità wriet li hija diffiċli biex tintlaħaq. 

Il-membri tal-grupp ta’ ħidma dwar il-Patt Ekoloġiku fil-Livell Lokali wissew kontra s-simplifikazzjoni li twassal għal ċentralizzazzjoni mill-ġdid; huma rrakkomandaw bil-qawwa li l-mudell ta’ ġestjoni kondiviża, il-governanza f’diversi livelli u l-prinċipju tas-sħubija jibqgħu l-prinċipji gwida tal-politika ta’ koeżjoni u ta’ kwalunkwe politika ta’ investiment futura. Huma enfasizzaw il-ħtieġa li jiġi mobilizzat aktar investiment privat, wara r-rakkomandazzjonijiet fl-Opinjoni reċenti tal-KtR dwar il-futur tal-politika tal-UE dwar il-klima.

“Il-Patt Ekoloġiku mhuwiex biss dwar il-klima u n-natura, huwa imperattiv għall-industrija, is-sigurtà u l-benesseri tal-UE. Is-setturi kollha għandhom ir-rwol tagħhom x'jaqdu. Neħtieġu trasformazzjoni sistemika, fejn inħarsu lejn liema huma l-aktar elementi kruċjali li jeħtieġ li jiġu aċċellerati fl-implimentazzjoni, li jkopru l-attivitajiet kollha li nistgħu nagħmlu fir-reġjuni u l-bliet”, enfasizza r-relatur Markku MARKKULA (FI/PPE), President tar-Reġjun ta’ Ħelsinki.

• Ara l-laqgħa
mill-ġdid• Gallerija tar-ritratti (Flickr)