Tá gá le fíorshimpliú rialacha chun leas a bhaint as acmhainneacht an chomhair phríobháidigh-phoiblí chun aghaidh a thabhairt ar éagothromaíochtaí críochacha

D’iarr réigiúin agus cathracha an Aontais Eorpaigh go mbeadh comhar níos láidre agus níos straitéisí ann idir údaráis phoiblí agus údaráis phríobháideacha chun éagothromaíochtaí críochacha agus eacnamaíocha san Eoraip a laghdú.

I dtuairim a glacadh d’aon toil ag an seisiún iomlánach an 4 Márta, dúirt comhaltaí Choiste Eorpach na Réigiún (CnaR), in ainneoin an dul chun cinn suntasach atá déanta le 20 bliain anuas, go bhfuil bearnaí suntasacha fós ann chun leas iomlán a bhaint as acmhainneacht an Bheartais Chomhtháthaithe infheistíochtaí príobháideacha a mhealladh agus fás marthanach a áirithiú ar fud na réigiún uile.

Tá neamhéifeachtúlachtaí maorlathacha, córais soláthair laga, rialuithe forluiteacha, easpa oiriúnaithe áitiúil agus éagobhsaíocht pholaitiúil i measc na bpríomhbhacainní arna sainaithint ag ceannairí réigiúnacha agus áitiúla a chuireann bac ar chomhar idir eintitis phoiblí agus phríobháideacha.

I dtuairim a dhréachtaigh Kristoffer Tamsons (SE/PPE), comhalta de Chomhairle Contae Stócólm, d’iarr CnaR go bhféachfaí ar ról níos mó a bheith ag an earnáil phríobháideach maidir leis an mBeartas Comhtháthaithe a neartú.

Agus caibidlíocht ar siúl maidir leis an gcéad bhuiséad fadtéarmach eile de chuid an Aontais do 2028–2034, leag na réigiúin agus na cathracha béim ar rannchuidiú suntasach na bhfiontar beag agus meánmhéide (FBManna) leis an mBeartas Comhtháthaithe, agus leag siad béim ar an ról atá acu mar phríomhspreagthóirí na forbartha eacnamaíche áitiúla. Le linn na clárthréimhse roimhe seo 2014-20, thacaigh an Beartas Comhtháthaithe le tuairim is cúig mhilliún FBM le 118 mbilliún euro agus rannchuidigh sé le 370 000 post díreach nua a chruthú.

Tacaíocht theicniúil ar an láthair chun dáileadh cothrom cistí a áirithiú

Chuir comhaltaí CnaR chun suntais gur gá do na hearnálacha poiblí agus príobháideacha oibriú le chéile chun a áirithiú go mbeidh fios gnó, infheistíocht agus cuntasacht ag gabháil le gach euro de chistiú ón Aontas – bíodh sin ó ghníomhaithe poiblí nó príobháideacha – chun torthaí fóinteacha a bhaint amach do shaoránaigh an Aontais.

Thug siad rabhadh go bhfuil bearna ag dul i méid idir réigiúin ar ceannairí nuálaíochta iad agus réigiúin bheagfhorbartha nach bhfuil an taithí chéanna ná an cumas institiúideach céanna acu tairbhe a bhaint as cistí agus ionstraimí airgeadais nua. Dá bhrí sin, ba cheart go n-áireofaí sa togra nua maidir le buiséad an Aontais tacaíocht leordhóthanach chomhairleach agus theicniúil do réigiúin nach bhfuil mórán taithí acu chun dáileadh cothrom cistí a áirithiú, a d’áitigh siad.

I measc na dtograí chun na rialacha a shimpliú do thairbhithe deiridh agus d’eintitis phoiblí, mhol ceannairí áitiúla agus réigiúnacha nósanna imeachta iniúchóireachta tadhaill éadroim a cheadú do thionscadail bheaga (faoi bhun EUR 100,000) má léirítear go soiléir a dtoradh. Mhol siad freisin sásra mear-athbhreithnithe a thabhairt isteach chun ceanglais náisiúnta dhíréireacha a shainaithint agus aghaidh a thabhairt orthu agus chun feabhas a chur ar ailíniú idir rialacha an Aontais agus rialacha náisiúnta, go háirithe rialacha maidir le státchabhair agus an fhéidearthacht cómhaoiniú náisiúnta a dhéanamh ar thionscadail arna gcistiú ag cistí an Bheartais Chomhtháthaithe.

Luaigh

Kristoffer Tamsons (SE/PPE), Comhalta de Chomhairle Contae Stócólm: ‘Níl rannpháirtíocht na hearnála príobháidí roghnach – tá sé ríthábhachtach d’athléimneacht fhadtéarmach agus do thionchar na n-infheistíochtaí comhtháthaithe.’

Cúlra

· Físeán agus grianghraif de sheisiún iomlánach CnaR.

· Tá CnaR ag obair ar 20 tuairim chun measúnú a dhéanamh ar ghnéithe agus rialacháin shonracha de bhuiséad fadtéarmach an Aontais 2028-34 a bheidh ann amach anseo (féach treochlár na dtuairimí). Cuimsítear leis sin tuairim a glacadh an 4 Márta, ina leagtar amach iarrataí agus ábhair imní maidir le struchtúr foriomlán an bhuiséid. Tuilleadh eolais faoi thuairimí a glacadh agus faoi phreaseisiúintí gaolmhara