Il-mexxejja lokali jappellaw għal aġenda ambizzjuża tal-UE li tinvesti fil-bliet bħala mutur tal-kompetittività u l-ġustizzja soċjali

Ir-reġjuni metropolitani u ż-żoni urbani funzjonali għandhom rwol vitali biex jixprunaw l-investiment sostenibbli, it-tkabbir ekonomiku, u l-iżvilupp territorjali bbilanċjat fl-Ewropa. Filwaqt li rrikonoxxew dan, ir-rappreżentanti lokali u reġjonali fl-14 ta’ Mejju adottaw b’mod unanimu Opinjoni – abbozzata minn Carmine Pacente, Kunsillier tal-Belt ta’ Milan – matul sessjoni plenarja tal-Kumitat tar-Reġjuni (KtR), li tappella għal dimensjoni urbana aktar b’saħħitha fil-Politika ta’ Koeżjoni ta’ wara l-2027. 

Bil-popolazzjonijiet urbani Ewropej mistennija jiżdiedu minn 75 % għal 84 % tat-total sal-2050, iż-żoni urbani u metropolitani jinsabu taħt pressjoni dejjem akbar u se jkollhom impatt dejjem akbar fuq l-iżvilupp sostenibbli tal-Unjoni Ewropea. Fl-Opinjoni adottata, il-KtR afferma mill-ġdid il-ħtieġa għal żvilupp territorjali bbilanċjat fl-Ewropa, xprunat mill-kooperazzjoni bejn iż-żoni urbani u rurali. F’dan il-qafas, strateġiji urbani u metropolitani b’saħħithom jistgħu jgħinu biex jiġu indirizzati wħud mill-aktar sfidi urġenti għall-Unjoni Ewropea kollha, bħat-tibdil demografiku, it-tranżizzjonijiet ekoloġiċi, diġitali u industrijali, u n-nuqqas ta’ akkomodazzjoni affordabbli. 

Il-mexxejja lokali u reġjonali ressqu t-talba tagħhom b’ħarsa lejn il-pubblikazzjoni ta’ aġenda ġdida għall-bliet mill-Kummissjoni Ewropea, li ġiet inkluża mill-President Von der Leyen fost il-prijoritajiet tal-mandat attwali. Huma ħeġġew lill-Kummissjoni biex tinvolvi lill-bliet żgħar, il-bliet u l-awtoritajiet lokali u reġjonali fl-istadji kollha tat-tfassil tal-aġenda, u biex tipprovdi assistenza speċifika lill-muniċipalitajiet żgħar u ta’ daqs medju kif ukoll lill-bliet. 

Il-Politika ta’ Koeżjoni tinvesti fl-iżvilupp urban sostenibbli

Il-membri tal-KtR enfasizzaw li l-mudell ta’ ġestjoni kondiviża tal-Politika ta’ Koeżjoni - li jinvolvi l-livelli Ewropej, nazzjonali, reġjonali u lokali ta’ governanza - jibqa’ sors importanti ta’ finanzjament għall-iżvilupp urban sostenibbli. Għalhekk appellaw għal Politika ta’ Koeżjoni b’saħħitha, flessibbli u riformata wara l-2027. Il-mexxejja lokali u reġjonali wissew ukoll li l-mekkaniżmi ta’ finanzjament tal-ġestjoni ċentralizzata, bħall-Faċilità għall-Irkupru u r-Reżiljenza, jistgħu jwasslu lill-gvernijiet nazzjonali biex jittraskuraw il-prijoritajiet lokali.  

Barra minn hekk, ir-reġjuni u l-bliet talbu lill-Istati Membri jittestjaw mekkaniżmi ta’ inċentivi li permezz tagħhom fondi mhux użati minn politiki ċentralizzati jistgħu jiġu diretti mill-ġdid direttament lejn programmi integrati reġjonali u jintużaw b’mod partikolari għall-benefiċċju taż-żoni urbani u metropolitani. 

Kwotazzjoni

Relatur Carmine Pacente (IT/Renew Europe), Kunsillier tal-Belt ta' Milan: “Billi tirrikonoxxi r-rwol dejjem jikber taż-żoni urbani u metropolitani, din l-Opinjoni tappella għal aġenda urbana tal-UE aktar b’saħħitha. Pereżempju, jitlob li jiżdied il-finanzjament għall-iżvilupp urban tal-Fond Ewropew għall-Iżvilupp Reġjonali lil hinn mit-8 % attwali u li tiġi stabbilita riżerva minima u obbligatorja ta’ 5 % tal-Fond Soċjali Ewropew+ biex jiġu indirizzati l-inugwaljanzi u l-ħtiġijiet tal-akkomodazzjoni. Barra minn hekk, tħeġġeġ lill-Istati Membri jintroduċu fil-programmi nazzjonali tagħhom ta’ ġestjoni kondiviża, riżervi finanzjarji għaż-żoni urbani u metropolitani mmirati lejn l-appoġġ għall-investimenti.”    

Il-kuntest

• Filmat u ritratti mis-sessjoni plenarja.

• Żona urbana funzjonali tikkonsisti f’belt abitata b’densità għolja u żona ta’ vvjaġġar b’popolazzjoni inqas densa li s-suq tax-xogħol tagħha huwa integrat ħafna mal-belt (sors: Eurostat).  

• Fil-15 ta’ Mejju, il-plenarja tal-KtR tivvota dwar żewġ riżoluzzjonijiet urġenti dwar il-baġit fit-tul li jmiss tal-Unjoni Ewropea u r-rieżami ta’ nofs it-terminu tal-programmi tal-Politika ta’ Koeżjoni 2021-27. Barra minn hekk, fl-14 ta’ Mejju, il-membri tal-KtR adottaw Opinjoni li tiffoka fuq il-Politika ta’ Koeżjoni bħala magna biex jintlaħqu l-għanijiet u r-riformi tal-UE. L-istqarrijiet għall-istampa se jiġu ppubblikati fit-taqsima ddedikata tas-sit web tal-KtR. 

• Mis-17 sad-19 ta’ Ġunju, il-belt ta’ Krakovja (il-Polonja) se tospita l-Forum tal-Bliet 2025, li se jiffoka fuq il-ġbir ta’ ideat għall-iżvilupp tal-aġenda ta’ politika tal-UE għall-bliet.