Gníomhaíocht níos láidre ón Aontas maidir le rannpháirtíocht agus cosaint na hóige iarrtha ag na ceannairí áitiúla agus réigiúnacha

I ndíospóireacht leis an gCoimisinéir Micallef, leag na réigiúin agus na cathracha béim ar an ngá atá le feabhas a chur ar bhearta an Aontais maidir le rannpháirtíocht na hóige, sábháilteacht ar líne agus cultúr

Bhí guthanna daoine óga i gcroílár díospóireachta faoi thodhchaí bheartas óige an Aontais, faoin gcibearbhulaíocht agus faoin gcultúr le Glenn Micallef, an Coimisinéir Eorpach um Chothroime Idirghlúine, an Óige, Cultúr agus Spórt, ag an gCoimisiún um Beartas Sóisialta, Oideachas, Fostaíocht, Taighde agus Cultúr (SEDEC) an 2 Feabhra.

Idirphlé óige leis an gCoimisinéir Eorpach Micallef

Ghlac an Coimisinéir Eorpach Glenn Micallef páirt in Idirphlé Óige le hionadaithe óige agus le ceannairí áitiúla agus réigiúnacha ag cruinniú Choimisiún SEDEC, ag malartú tuairimí maidir le príomhthosaíochtaí do bheartas óige agus d’earnálacha cultúrtha na hEorpa. Díríodh sa phlé ar fheabhas a chur ar bhearta chun an chibearbhulaíocht a chomhrac, ar thionscnamh nua an Chompáis Cultúir, agus ar ghné na hóige de Erasmus+, agus ar ghnéithe cultúrtha thogra AgoraEU le haghaidh 2028-34.

Leag na ceannairí áitiúla agus réigiúnacha béim ar a thábhachtaí atá cothroime idirghlúine, rannpháirtíocht agus cultúr na hóige mar spreagadh don chomhtháthú sóisialta agus d’Aontas níos cuimsithí, níos cothroime agus níos láidre. D’áitigh siad ar an Aontas agus ar gach leibhéal rialtais breithniú córasach a dhéanamh ar thionchair fhadtéarmacha na mbeartas atá ann faoi láthair chun feabhas a chur ar cháilíocht an cheaptha beartas agus chun a áirithiú go mbeidh rath ar na glúnta atá le teacht freisin agus d’iarr siad go ndéanfaí an rialachán atá ann cheana a fhorfheidhmiú ar bhealach níos láidre chun sábháilteacht ar líne do leanaí agus do dhaoine óga a chur chun cinn. D’athdhearbhaigh siad freisin tiomantas Choiste Eorpach na Réigiún a áirithiú go n-éistfear le guthanna daoine óga i gceapadh beartas an Aontais.

Seo mar a labhair Glenn Micallef, an Coimisinéir um Chothroime Idirghlúine, um an Óige, um Chultúr agus um Spórt: “Tá todhchaí na hEorpa á múnlú ag daoine óga gach lá — ar líne, as líne, agus ina bpobail. Is é ár bhfreagracht a chinntiú gur féidir leo é sin a dhéanamh go sábháilte, go cruthaitheach agus go muiníneach. Trí dhaoine óga a chosaint ar líne agus rochtain ar chultúr a leathnú, táimid ag infheistiú ina bhfolláine agus in Eoraip níos cuimsithí a éisteann go fírinneach lena réigiúin.”

An Óige agus an Cultúr i mbuiséad fadtéarmach an Aontais 2028-34

Ghlac comhaltaí SEDEC dréacht-tuairim  maidir leis an gcéad chlár Erasmus+ eile, atá mar chuid den togra nua maidir le buiséad fadtéarmach an Aontais, ina n-iarrtar rochtain do mhic léinn uile an Aontais, earnáil thiomnaithe spóirt, agus rannpháirtíocht iomlán na n-údarás áitiúil agus réigiúnach.

Seo mar a labhair an Rapóirtéir Roberto Pella (IT/PPE), méara Valdengo: “Ní hamháin go bhfuil Erasmus+ ar cheann de na cláir is mó aitheantas ag saoránaigh na hEorpa; is bunchloch dár bhféiniúlacht choiteann Eorpach í. Chun leanúint d’infheistíocht a dhéanamh in Erasmus+, ní mór infheistíocht a dhéanamh i dtodhchaí na hEorpa agus Aontas a thógáil a bheidh níos iomaíche, níos cuimsithí agus níos gaire dá dhaoine óga. Tabharfaidh Coiste Eorpach na Réigiún a phróiseas éisteachta agus idirphlé chun críche agus cuirfidh sé tograí nithiúla faoi bhráid chomhlachtaí reachtacha an Aontais chun Erasmus+ a neartú do chríocha agus do phobail, in ómós d’oidhreacht Shóifia Corradi,’ tionchar múnlaitheach ar chlár Erasmus.

I ndréacht-tuairim  a glacadh ag an gcruinniú, thacaigh na ceannairí áitiúla agus réigiúnacha le clár AgoraEU, a chruthófar faoi bhuiséad nua fadtéarmach an Aontais, mar phríomhcholún chun an cultúr, neamhspleáchas na meán, athléimneacht dhaonlathach agus rannpháirtíocht na saoránach a chosaint, agus d’iarr siad go n-aithneofaí na húdaráis áitiúla agus réigiúnacha mar chomhpháirtithe ríthábhachtacha.

Seo mar a labhair an Rapóirtéir Csaba Borboly (RO/PPE), Leas-Uachtarán Chontae Harghita: “Ba ghnách leis an agora a bheith i gcroílár an phobail — agus ní mór do AgoraEU a bheith i láthair i ngach pobal, ní hamháin i gcathracha móra. Ciallaíonn sé sin táscairí críochacha chun rochtain chothrom gheografach a áirithiú, deontais bheaga shimplithe le tacaíocht áitiúil, agus cosaint láidir do theangacha agus do chultúir mhionlaigh. Ní mór d’údaráis áitiúla a bheith ina gcomhpháirtithe, ní hamháin ina dtairbhithe.”

Tá sé beartaithe an dá dhréacht-tuairim a ghlacadh le linn sheisiún iomlánach CnaR i mí na Bealtaine. 

An óige agus mionaoisigh a chosaint sa réimse digiteach

D’iarr comhaltaí SEDEC go dtabharfaí cosaint níos láidre do leanaí agus do dhaoine óga sa réimse digiteach trí ghníomhaíocht chomhordaithe ar leibhéal an Aontais, ar an leibhéal náisiúnta, ar an leibhéal réigiúnach agus ar an leibhéal áitiúil i ndréacht-tuairim  a glacadh ag an gcruinniú tar éis tarchur ó Uachtaránacht na Cipire. D’áitigh siad go mbeadh freagracht ardáin níos déine, fíorú aoise éifeachtach agus toiliú tuismitheora, agus rialacha níos soiléire ann d’fhógraíocht agus do thionchairí, ach dhiúltaigh siad do thoirmisc ghinearálta.

Bhí an méid seo a leanas le rá ag an Rapóirtéir Heike Raab (DE/PSE), Státrúnaí, Rialtas Stáit Phalaitíneacht Dhúiche na Réine: “Tá sé tuillte ag leanaí agus ag daoine óga fás aníos i dtimpeallacht dhigiteach atá sábháilte, cothrom agus cumhachtaithe. Léirítear sa tuairim seo an chaoi ar féidir leis na húdaráis áitiúla agus réigiúnacha mionaoisigh a chosaint ar líne agus an litearthacht dhigiteach, an athléimneacht dhigiteach agus an cuimsiú digiteach á neartú ag an am céanna. Ní mór don aistriú digiteach a bheith ag obair do leanaí — ní ina gcoinne.”

Tá sé beartaithe an dréacht-tuairim a ghlacadh ag seisiún iomlánach CnaR i mí na Bealtaine.

Le linn an chruinnithe freisin

Bhí malartú tuairimí ag comhaltaí choimisiún SEDEC maidir leis an tuairim Fís Eorpach - an 10ú Clár Réime um Thaighde agus um Nuálaíocht, leis an rapóirtéir Anne Besnier (FR/PSE), Leas-Uachtarán Réigiún Centre-Val de Loire. Tá an clár mar chuid de thogra nua an Aontais maidir le buiséad fadtéarmach. Tá sé beartaithe an tuairim a ghlacadh le linn sheisiún iomlánach CnaR i mí na Bealtaine.

Thionóil Coimisiún SEDEC díospóireacht thaiscéalaíoch freisin ar an tuairim maidir le Folláine agus Sochair Leanaí - córais sochair leanaí a mhapáil ar fud Bhallstáit an Aontais, tarchur ó Uachtaránacht CY, leis an rapóirtéir Fauzaya Talhaoui (BE/PSE), uachtarán Chomhairle Chúige Antuairp. Tá sé beartaithe an tuairim a ghlacadh le linn sheisiún iomlánach CnaR i mí an Mhárta

Ar deireadh, cheap comhaltaí SEDEC Tsvetelina Simeonova-Zarkin (BG/Renew), comhalta de Chomhairle Bhardasach Shóifia, mar rapóirtéir don tuairim maidir le Bauhaus Eorpach Nua, atá mar chuid den Phacáiste Tithíochta a d’fhoilsigh an Coimisiún Eorpach i mí na Nollag 2025. 

Cúlra

•  Físeán ón gcruinniú. 
• I mí na Samhna 2025, sheol an Coimisiún Eorpach an Compás Cultúir le haghaidh Europ e chun an cultúr a chur i gcroílár na n-iarrachtaí chun féiniúlacht Eorpach a chothú, éagsúlacht a cheiliúradh agus barr feabhais a chur chun cinn
• Foilseoidh an Coimisiún Eorpach an straitéis um Chothroime Idirghlúine an 4 Márta.
• Tuairim maidir le Cothroime Idirghlúine: Cur chuige Áitiúil agus Réigiúnach maidir le Sochaithe Cuimsitheacha agus Inbhuanaithe a Thógáil (2025).  
• Mar chuid de thogra CAI, thíolaic an Coimisiún Eorpach an méid seo a leanas i mí Iúil 2025:
  •  Clár Erasmus+ don tréimhse 2028-2034, chun tacú le soghluaisteacht foghlama agus fothú acmhainneachta san oideachas, san oiliúint, san óige agus sa spórt.
  • Clár AgoraEU chun cultúr a chur chun cinn, saoirse ealaíne agus saoirse na meán a chosaint agus comhionannas agus saoránacht ghníomhach a chur chun cinn.
• Staidéar SEDEC maidir le cosaint na hóige sa réimse digiteach, (Eanáir 2026).
• Tá an Coimisiún Eorpach le teachtaireacht a ghlacadh maidir le ‘Feabhas a chur ar an Straitéis maidir le Cearta Daoine faoi Mhíchumas suas go dtí 2030’, le linn an dara ráithe de 2026.  

 Teagmháil:

Ângela Machado

Teil: +32 475 41 31 58

Angela.machado@cor.europa.eu