An obair a dhéanaimid
Gnóthaí Bunreachtúla agus Institiúideacha
Déanann an Coimisiún um Shaoránacht, Rialachas, Gnóthaí Institiúideacha agus Seachtracha (CIVEX) comhordú ar obair reachtach CnaR maidir le todhchaí na hEorpa, an daonlathas, an rialachas il-leibhéil agus an dílárú, an tsaoránacht agus rannpháirtíocht na saoránach agus cur i gcoinne na bréagaisnéise.
Díríonn Coimisiún CIVEX, mar aon le coimisiúin eile de chuid CnaR, ar an gcoimhdeacht ghníomhach agus ar an rialáil níos fearr leis an nGrúpa Stiúrtha um Rialáil Níos Fearr agus Coimhdeacht Ghníomhach, a stiúrann an obair maidir le faireachán a dhéanamh ar an gcoimhdeacht agus a chomhordaíonn an Sainghrúpa um Choimhdeacht.
An limistéar saoirse, slándála agus ceartais
Tá ról gníomhach ag CIVEX maidir le beartais, cuir i gcás imirce agus tearmann, lánpháirtiú náisiúnach tríú tír, slándáil agus frithradacú, an smacht reachta agus cearta bunúsacha.
Leis an líonra ‘Cathracha agus Réigiúin ar mhaithe le hImircigh a Lánpháirtiú’, cuirtear ardán polaitiúil ar fáil do na húdaráis áitiúla agus réigiúnacha chun dea-shamplaí de lánpháirtiú na n-imirceach agus na ndídeanaithe a léiriú, faisnéis a roinnt agus an éagsúlacht a chur chun cinn d’fhonn cathracha cuimsitheacha agus comhtháthú sóisialta a chinntiú.
Ina theannta sin, bronnann CnaR Gradam bliantúil an Mhéara Paweł Adamowicz orthu siúd a rinne a seacht ndícheall chun an tsaoirse, an dlúthpháirtíocht agus an comhionannas a chur chun cinn, in ainneoin na rioscaí.
Méadú an Aontais
D’fhonn an t-idirphlé polaitiúil a chothú leis na húdaráis áitiúla agus réigiúnacha i dtíortha an mhéadaithe, déanann CIVEX bainistiú ar na comhchoistí comhairliúcháin leis an Albáin, an Mhacadóin Thuaidh, Montainéagró agus an tSeirbia agus ar na meithleacha leis an mBoisnia agus an Heirseagaivéin, leis an gCosaiv, leis an Moldóiv, leis an Tuirc agus leis an Úcráin. Gach bliain, eagraítear cruinnithe sa Bhruiséil agus sa tír chomhpháirtíochta chun malartú taithí agus dea-chleachtas a éascú.
Sheol CnaR agus comhpháirtithe na n-údarás áitiúil agus réigiúnach ón Aontas agus ón Úcráin Comhghuaillíocht Eorpach na gCathracha agus na Réigiún ar mhaithe le hAtógáil na hÚcráine, chun a n-iarrachtaí comhpháirteacha a chomhordú chun tacú le téarnamh agus atógáil na hÚcráine.
Beartas comharsanachta an Aontais agus comhpháirtíochtaí idirnáisiúnta
Is fóram polaitiúil iad Comhdháil na nÚdarás Réigiúnach agus Áitiúil i dtaca le Comhpháirtíocht an Oirthir (CORLEAP) agus an Comhthionól Réigiúnach agus Áitiúil Eora-Mheánmhara (ARLEM) le haghaidh idirphlé agus malartú leis na húdaráis áitiúla agus réigiúnacha ó thíortha comharsanachta san Oirthear agus sa Mheánmhuir faoi seach.
A mhéid a bhaineann le comhpháirtíochtaí idirnáisiúnta, cuireann CnaR na tionscnaimh um chomhar díláraithe chun cinn, trí idirphlé beartais maidir le logánú na spriocanna forbartha inbhuanaithe a dhéanamh go rialta leis na Náisiúin Aontaithe, agus tríd an bhFóram débhliantúil ‘Cathracha agus Réigiúin ar son Comhpháirtíochtaí Idirnáisiúnta’ a eagraítear i gcomhar leis an gCoimisiún Eorpach. Sheol CnaR Tionscnamh na Niocóise freisin chun an comhar díláraithe idir an tAontas agus an Libia a chothú agus chun feabhas a chur ar shaol daoine agus ar sholáthar seirbhísí poiblí áitiúla i dtimpeallacht leochaileach.
Tacaíonn Coimisiún CIVEX freisin leis an nGrúpa Teagmhála idir Coiste Eorpach na Réigiún agus an Ríocht Aontaithe chun a chinntiú go leanfar den idirphlé polaitiúil le hionadaithe ó rialtas áitiúil agus riaracháin dhíláraithe na Ríochta Aontaithe tar éis tharraingt siar na Ríochta Aontaithe as an Aontas.
Bíonn CIVEX ag tacú leis an dlúthchomhar oibre idir Comhdháil na nÚdarás Áitiúil agus Réigiúnach le Comhairle na hEorpa. Is de thiomantas an dá institiúid sin an daonlathas a neartú agus a chur chun cinn go háitiúil agus go réigiúnach.
