Ní comhtháthú eacnamaíoch, sóisialta agus críochach go comhar AE, náisiúnta agus réigiúnach.
An comhtháthú
Is cuspóir bunúsach de chuid an Aontais Eorpaigh é an Comhtháthú Eacnamaíoch, Sóisialta agus Críochach, arb é is aidhm dó éagothromaíochtaí idir réigiúin a laghdú agus forbairt chothromaithe a áirithiú ar fud na gcríoch uile. Teastaíonn rannpháirtíocht ghníomhach na n-údarás áitiúil agus réigiúnach chun an sprioc sin a bhaint amach ós rud é gurb iad is fearr atá in ann freagairt do riachtanais shonracha na bpobal.
Sa chomhthéacs sin, leagann CnaR béim ar a thábhachtaí atá sé go ndéanfaí an Creat Airgeadais Ilbhliantúil tar éis 2027 a cheapadh i ndlúthchomhar leis na húdaráis áitiúla agus réigiúnacha. Ar an iomlán, ní mór prionsabal na comhpháirtíochta a neartú, agus caithfear rabhadh a thabhairt i gcoinne treochtaí a lárú a d’fhéadfadh an rialachas áitiúil a lagú.
Molann CnaR go mbeadh ionstraimí láidre airgeadais ann chomh maith le neamhspleáchas fioscach níos fearr ar an leibhéal réigiúnach, agus foinsí nua ioncaim an Aontais chun aghaidh a thabhairt ar dhúshláin a thiocfaidh chun cinn amach anseo agus, agus an méid sin á dhéanamh, ní mór a bheith ailínithe le tosaíochtaí fadtéarmacha an Aontais ag an am céanna. Ina theannta sin, tá sé ríthábhachtach aontas na margaí caipitil a dhoimhniú, timpeallacht infheistíochta níos tacúla a chothú (go háirithe d’fhiontair bheaga agus mheánmhéide) agus creataí rialála a fheabhsú trí ualaí riaracháin a laghdú.
Áirítear ar phríomhthosaíocht an chomhtháthaithe ábhair a bhaineann leis an méid seo a leanas:
- An t-iomaíochas
- Buiséad an Aontais
- Aistriú cóir
- Tithíocht inbhuanaithe inacmhainne
Athléimneacht
Sa chiall is leithne den choinceap, is éard is athléimneacht ann an cumas freagairt do thubaistí nádúrtha agus do thubaistí arb é an duine is ciontach leo, do bhagairtí slándála agus don éagobhsaíocht eacnamaíoch agus pholaitiúil laistigh den Aontas agus ar fud an domhain mhóir. Ní hathléimneacht go dlúthchomhar ar gach leibhéal rialachais, agus ní mór cumas an Aontais agus na n-údarás áitiúil agus réigiúnach freagairt do chineálacha éagsúla géarchéimeanna a neartú trí ionstraimí agus acmhainní airgeadais iomchuí.
Tá CnaR ag iarraidh go gcuirfí feabhas ar chomhordú agus ar chistiú chun cabhrú leis na réigiúin aistrithe móra agus tionchair ghéarchéime a bhainistiú agus údaráis áitiúla agus réigiúnacha a chumhachtú i réimsí amhail gníomhú ar son na haeráide, slándáil fuinnimh agus bainistiú uisce.
Áirítear ar phríomhthosaíocht na hathléimneachta ábhair a bhaineann leis an méid seo a leanas:
- An comhar trasteorann
- An t-athrú aeráide
- An athléimneacht uisce
- Fuinneamh atá glan, slán, inacmhainne
- An tsláinte
- An talmhaíocht
- An tslándáil
Is infheistíocht in athléimneacht chathracha agus réigiúin an Aontais í tacaíocht bhuanseasmhach CnaR do chathracha agus do réigiúin na hÚcráine. Cuirtear sin in iúl tríd an gComhghuaillíocht ar mhaithe le hAtógáil na hÚcráine, ós rud é go dtugann sé deis foghlaim ó thaithí chomhpháirtithe na hÚcráine.
Gaireacht
Is éard atá i gceist leis an ngaireacht an tAontas Eorpach (AE) a thabhairt níos gaire dá shaoránaigh trí rialtais áitiúla agus réigiúnacha a chumhachtú chun freagairt go héifeachtach do riachtanais na bpobal. Cuireann Coiste Eorpach na Réigiún i bhfios go láidir gur ar an leibhéal áitiúil a thógtar muinín as an Aontas, áit a bhfuil an nasc is laidre ag na hinstitiúidí le saol laethúil na ndaoine. Trí rialachas áitiúil a neartú, cuidítear le haghaidh a thabhairt ar phríomhdhúshláin amhail an t-athrú déimeagrafach, cuimsiú sóisialta agus soláthar seirbhísí poiblí. Leagann CnaR béim ar a thábhachtaí atá rannpháirtíocht na saoránach, go háirithe i measc daoine óga, agus athdhearbhaíonn sé a dtiomantas do thionscnaimh lena gcuirtear rannpháirtíocht, comhionannas inscne agus athnuachan dhaonlathach chun cinn ar fud réigiúin na hEorpa.
Áirítear ar phríomhthosaíocht na hgaireachta ábhair a bhaineann leis an méid seo a leanas:
- An t-athrú déimeagrafach
- An daonlathas áitiúil
- Comhionannas idir na hinscní
- An óige
