L-involviment fil-livell lokali u reġjonali huwa kruċjali għat-tranżizzjoni tal-enerġija tal-UE

Ir-reġjuni u l-bliet enfasizzaw li l-għoti tas-setgħa lill-awtoritajiet lokali u reġjonali b’riżorsi, kompetenzi u appoġġ politiku adegwati huwa kruċjali biex jintlaħqu l-miri klimatiċi tal-UE u tranżizzjoni tal-enerġija ġusta. L-Opinjoni adottata mill-Kumitat Ewropew tar-Reġjuni (KtR) fl-14 ta’ Ottubru tenfasizza l-ħtieġa urġenti li jiżdiedu l-produzzjoni u l-provvista tal-enerġija nadifa fl-UE biex jiġu żgurati l-kompetittività u s-sigurtà tal-provvista filwaqt li jiġi dekarbonizzat is-settur tal-enerġija u fl-istess ħin jiġi indirizzat il-faqar enerġetiku.

L-hekk imsejjaħ pakkett “Lesti għall-mira ta’ 55 %” għandu l-għan li jqiegħed lill-UE fit-triq biex tikseb in-newtralità klimatika sal-2050, billi jibda bit-tnaqqis tal-emissjonijiet ta’ gassijiet serra b’mill-inqas 55 % sal-2030. Dan jimponi ħafna obbligi fuq l-awtoritajiet lokali u reġjonali, inklużi rekwiżiti aktar stretti għar-rinnovazzjonijiet tal-bini, mandati estiżi għall-integrazzjoni tal-enerġija rinnovabbli fil-livell lokali, u miri vinkolanti għall-effiċjenza enerġetika għall-bini tas-settur pubbliku. Madankollu, kif enfasizzat minn studju reċenti tal-KtR u r-Rapport Annwali tal-UE dwar l-Istat tar-Reġjuni u l-Bliet, dawn jiffaċċjaw sfidi sinifikanti marbuta mar-riżorsi finanzjarji, il-kapaċità amministrattiva, l-involviment tal-komunità lokali, u l-allinjament regolatorju, b’disparitajiet sinifikanti bejn l-Istati Membri.

Bl-Opinjoni abbozzata minn Joško Klisović (HR/PSE), Membru tal-Assemblea tal-Belt ta’ Zagreb, il-KtR jipproponi li jiġi stabbilit Pjan ta’ Azzjoni tal-UE li jappoġġja lill-awtoritajiet lokali u reġjonali fil-ħolqien ta’ aġenziji ġodda tal-enerġija u punti uniċi ta’ servizz b’finanzjament inizjali u assistenza teknika. Huwa jappella wkoll biex jiġi żgurat l-involviment bikri, kontinwu u sinifikanti tal-awtoritajiet lokali u reġjonali fl-ippjanar, l-implimentazzjoni u l-monitoraġġ tal-politiki nazzjonali u tal-UE dwar l-enerġija, b’mod partikolari fir-rigward tat-tħejjija tal-Pjani Nazzjonali għall-Enerġija u l-Klima u l-Pjani Soċjali għall-Klima.

Il-KtR jipproponi li jassumi r-rwol ta’ Forum ta’ Implimentazzjoni Lokali “Lesti għall-mira ta’ 55 %” b’fergħa ta’ assistenza teknika u funzjoni ta’ tlaqqigħ finanzjarju, li jgħin lill-awtoritajiet lokali u reġjonali jsibu strumenti xierqa tal-UE, sħubijiet pubbliċi-privati u l-aħjar prattiki biex jespandu l-proġetti. Ir-reġjuni u l-bliet qed jitolbu wkoll lill-Kummissjoni Ewropea tippubblika kull sena Tabella ta’ Valutazzjoni tal-Implimentazzjoni Lokali “Lesti għall-mira ta’ 55 %” biex issegwi l-progress fuq indikaturi ewlenin, bħall-użu tal-enerġija rinnovabbli, ir-rati ta’ rinnovazzjoni tal-bini, l-aġġornamenti tal-grilja u t-tnaqqis tal-faqar enerġetiku.

Filwaqt li l-proposta tal-Kummissjoni Ewropea li tittriplika l-baġit tal-Faċilità Nikkollegaw l-Ewropa fil-baġit fit-tul li jmiss tal-UE tirrappreżenta pass sinifikanti ’l quddiem fil-finanzjament tat-tranżizzjoni tal-enerġija, il-KtR iwissi li ċ-ċentralizzazzjoni proposta tal-fondi tal-UE permezz ta’ pjani nazzjonali uniċi timmina l-involviment u s-sjieda fil-livelli reġjonali u lokali. Huwa jħeġġeġ li tingħata spinta lill-kapaċità amministrattiva u teknika tal-awtoritajiet lokali u reġjonali b’assistenza teknika diretta ffinanzjata mill-UE u strumenti ta’ finanzjament kaskata, bħall-Faċilità tal-Bliet Ewropej, u jissuġġerixxi l-iżvilupp ta’ programm ta’ taħriġ madwar l-UE kollha għal dawk li jfasslu l-politika u l-persunal lokali u reġjonali.

L-indirizzar tal-faqar enerġetiku jenħtieġ li jkun prijorità wkoll, peress li l-piż tal-kostijiet għoljin tar-rinnovazzjoni bil-quddiem u tal-effiċjenza enerġetika jaffettwa b'mod sproporzjonat lill-unitajiet domestiċi b'introjtu baxx u foqra fl-enerġija. Il-KtR jappella għal miżuri lokali mmirati biex tiġi żgurata tranżizzjoni ġusta, bħal self għar-rinnovazzjoni b’imgħax żero, sussidji diretti għal unitajiet domestiċi b’introjtu baxx u appoġġ għal inizjattivi tal-enerġija bbażati fil-komunità.

Ir-reġjuni u l-bliet qed jappellaw ukoll biex jitħaffef il-proċess għall-għoti ta’ permessi għal proġetti tal-enerġija rinnovabbli b’sistema diġitali armonizzata għall-għoti ta’ permessi fl-UE kollha. Huma jindikaw il-ħtieġa għal investiment sinifikanti biex jittejbu l-kapaċità u l-flessibbiltà tal-grilji tal-elettriku u biex jiġu mmodernizzati u adattati għat-taħlita enerġetika attwali, u biex tiġi estiża l-infrastruttura tal-ħżin tal-enerġija. L-appoġġ għandu jingħata prijorità għall-grilji intelliġenti, il-ħżin, il-komunitajiet tal-enerġija rinnovabbli, l-akkoppjament tas-setturi u s-sistemi tal-enerġija deċentralizzati.

Kwotazzjoni:

Ir-relatur Joško Klisović (HR/PSE), Membru tal-Assemblea tal-Belt ta’ Zagreb: “L-implimentazzjoni tal-pakkett “Lesti għall-mira ta’ 55 %” tiddependi fil-biċċa l-kbira fuq l-għoti tas-setgħa lill-awtoritajiet lokali u reġjonali biex jagħmlu x-xogħol. Dak li neħtieġu huwa l-assistenza finanzjarja u teknika u l-aċċess dirett għall-fondi tal-UE.”

• Filmat u ritratti mis-sessjoni plenarja tal-KtR

Kuntatt:
Lauri Ouvinen
Tel. +32 473536887
lauri.ouvinen@cor.europa.eu