Ullmhaíonn ceannairí áitiúla agus réigiúnacha tograí chun gníomhaíocht an Aontais maidir leis an mbochtaineacht, scileanna agus comhionannas inscne a neartú

Ba iad an bhochtaineacht a chomhrac, an bhearna scileanna a laghdú, agus cearta na mban a chur chun cinn na príomhábhair a phléigh ceannairí áitiúla agus réigiúnacha ag cruinniú an Choimisiúin um Beartas Sóisialta, Oideachas, Fostaíocht, Taighde agus Cultúr (SEDEC),a tionóladh in Sliema, Málta an 17 Meitheamh.

Straitéis an Aontais i gcoinne na Bochtaineachta

In 2023, bhí 94.6 milliún duine i mbaol bochtaineachta san Aontas. Mar fhreagairt air sin, ghlac comhaltaí SEDEC tuairim inar iarradh go ndéanfadh an Coimisiún Eorpach Straitéis uaillmhianach Frithbhochtaineachta de chuid an Aontais in 2026, a bheadh ailínithe le Spriocanna Forbartha Inbhuanaithe 2030 na Náisiún Aontaithe agus arb é is aidhm di sprioc Cholún Eorpach na gCeart Sóisialta a shárú, is é sin laghdú 15 mhilliún duine a dhéanamh ar an mbochtaineacht. Chuir siad i bhfios go láidir gur sárú ar chearta an duine í an bhochtaineacht agus d’áitigh siad go dtabharfaí freagairt chomhordaithe ar gach leibhéal rialachais. I measc na bpríomhéileamh bhí ‘seiceáil bochtaineachta’ i measúnuithe tionchair beartais uile an Aontais, Comhordaitheoir Frithbhochtaineachta an Aontais, dul i ngleic leis an easpa dídine, tithíocht shóisialta, agus pá cothrom. Chuir na Feisirí i bhfios go láidir go bhfuil na húdaráis áitiúla agus réigiúnacha ar thús cadhnaíochta sa chomhrac i gcoinne na bochtaineachta agus nach mór acmhainní leordhóthanacha a thabhairt dóibh chun freagairt go héifeachtach. 

Seo mar a labhair an Rapóirtéir Yonnec Polet (BE/PSE), Comhalta de Chomhairle Bardais Berchem-Sainte-Aga: “Ní teip phearsanta í an bhochtaineacht — is dúshlán polaitiúil comhchoiteann í. Ní mór don Aontas a uaillmhian a mheaitseáil le gníomhaíocht trí údaráis áitiúla a chumhachtú, trí chosaint shóisialta a neartú, agus trí dhínit a dhaingniú i ngach beartas. Ní mór Straitéis nua Frithbhochtaineachta an Aontais a bheith misniúil, dea-mhaoinithe, bunaithe ar chearta, agus ní mór réitigh nithiúla a chur ar fáil léi do theaghlaigh maidir le hioncam, obair ar ardchaighdeán, tithíocht agus rochtain ar sheirbhísí sóisialta.” 

Straitéis Aontas na Scileanna 

I ndréacht-tuairim a glacadh ag an gcruinniú, chuir comhaltaí SEDEC i bhfios go láidir go bhfuil infheistíocht i scileanna ríthábhachtach d’athléimneacht, d’iomaíochas agus do chomhtháthú críochach na hEorpa, go háirithe do réigiúin thuaithe, iargúlta agus bheagfhorbartha. D’iarr na húdaráis áitiúla agus réigiúnacha go mbeadh straitéisí áitbhunaithe ann lena ndéanfaí forbairt scileanna a ailíniú le riachtanais eacnamaíocha áitiúla chun aghaidh níos fearr a thabhairt ar eisimirce na hóige, ar an mbearna sa bhonneagar, ar imirce daoine oilte agus ar ghanntanais múinteoirí. D’áitigh siad freisin go mbeadh córas oideachais nua-aimseartha ann lena gcuirfí scileanna digiteacha agus foghlaim ar feadh an tsaoil chun cinn, lena n-éascófaí an t-uas-sciliú agus an t-athsciliú. Tá cistiú níos fearr ón Aontas agus tacaíocht theicniúil níos láidre do na húdaráis áitiúla agus réigiúnacha ríthábhachtach chun scileanna réigiúnacha a chur chun cinn agus chun lucht saothair na hEorpa a ullmhú do dhúshláin mhargadh an tsaothair amach anseo, a dúirt na comhaltaí.

 Seo mar a labhair an Rapóirtéir Emil Boc (RO/PPE), Méara Bhardas Cluj-Napoca, Contae Cluj: "Ní hamháin gur tionscnamh polaitiúil é Aontas na Scileanna a sheol an Coimisiún Eorpach, is fís straitéiseach é agus is cur chuige níos tuisceanaí ar fud na hEorpa é. Ní bhaineann an tionscnamh seo le smaointe a bhailiú amháin — baineann sé lenár sochaithe a ullmhú do thodhchaí na hoibre, comhthuiscint idir réigiúin a chothú, agus foinsí nasctha agus éagsúlachta a dhéanamh de na dúshláin a bhí ann tráth.’ 

Cearta na mban san Aontas a neartú: Dearcadh áitiúil agus réigiúnach 

Ba dhíol sásaimh do na réigiúin agus na cathracha Treochlár an Aontais maidir le Cearta na mBan agus d’aithin siad an dul chun cinn atá déanta maidir le comhionannas inscne. Mar sin féin, i ndréacht-tuairim a glacadh ag an gcruinniú, leag siad béim ar an easpa aitheantais maidir leis an ról lárnach atá acu i gcur chun feidhme na mbeartas sin. D’iarr siad go n-aithneofaí iad mar chomhpháirtithe straitéiseacha i Straitéis an Aontais maidir le Comhionannas Inscne atá ar na bacáin agus d’éiligh siad cistiú leordhóthanach, tacaíocht institiúideach, agus buiséad athchóirithe de chuid an Aontais lena ndéantar an comhionannas inscne a phríomhshruthú go córasach. D’áitigh na Feisirí go ndéanfaí gníomhaíocht phráinneach chun dul i ngleic leis an bhforéigean inscnebhunaithe, chun aghaidh a thabhairt ar bhearnaí i gcúram sláinte na mban, agus chun rannpháirtíocht pholaitiúil agus eacnamaíoch chomhionann a chur chun cinn. D’áitigh siad freisin go mbeadh sásraí cuntasachta ann amhail faireachlanna neamhspleácha maidir le comhionannas inscne, iniúchtaí rialta inscne, agus comhar níos láidre idir gach leibhéal rialachais agus an tsochaí shibhialta. 

Seo mar a labhair an Rapóirtéir Carina Ohlsson (SE/PSE), Comhalta den Chomhairle Bhardasach, Bardas Lidköping: “Tosaíonn an comhionannas inscne go háitiúil. Más mian leis an Aontas an bhearna idir na hinscní a dhúnadh, ní mór aitheantas a thabhairt do chathracha agus do réigiúin ní hamháin mar fheidhmeoirí, ach mar chomhpháirtithe straitéiseacha — agus na hacmhainní, na huirlisí agus an spás polaitiúil a bheith ar thús cadhnaíochta. Ó sheirbhísí go ceannaireacht, ní mór an comhionannas a leabú i ngach sraith rialachais.” 

Ag an gcruinniú freisin: 

Thíolaic an tAirmheán Comhpháirteach Taighde (JRC) an tionscnamh ‘Nuálaíochtle haghaidh Claochlú Áitbhunaithe’,réamhbheart a seoladh i mí Dheireadh Fómhair 2024 agus a bheidh ar siúl go dtí 2026, arb é is aidhm dó tacú leis an nuálaíocht réigiúnach agus áitiúil trí shonraí agus fianaise chun bonn eolais a chur faoin gcéad Chlár Réime eile agus faoin gcéad Ghníomh Eorpach um Nuálaíocht eile. Tá trí phríomhcholún sa tionscnamh: múscailt feasachta, fothú acmhainneachta agus turais thaiscéalaíocha chun beartais nuálaíochta chlaochlaitheacha maidir le príomhdhúshláin shochaíocha a thástáil, agus thart ar 200 críoch rannpháirteach iontu. Chuir na comhaltaí i bhfios go láidir nár cheart don nuálaíocht díriú ar an bhfás eacnamaíoch amháin, ach nach mór di an cuimsiú sóisialta agus an ceartas críochach a chur chun cinn freisin. 

Cheap comhaltaí SEDEC Jozef Viskupič (SK/Renew Europe), Cathaoirleach Réigiún Féinrialaitheach Trnava, mar rapóirtéir don tuairim maidir le Straitéis AE um Ghnólachtaí Nuathionscanta agus um Ghnólachtaí atá i mbun Fáis.

Cúlra

 Físeán agus grianghraif ón gcruinniú.