L-Istat tar-Reġjuni u l-Bliet fl-Unjoni Ewropea

Nifhmu l-Ewropa mill-perspettiva lokali u reġjonali

Abbażi ta’ studji oriġinali kkummissjonati mill-Kumitat Ewropew tar-Reġjuni, kif ukoll abbażi ta’ riċerka akkademika, kontributi minn istituzzjonijiet Ewropej oħra u dokumentazzjoni b’sors miftuħ, dan ir-rapport jipprovdi fatti u data għal dawk li jfasslu l-politika u għall-partijiet ikkonċernati rilevanti. Is-sejbiet u r-rakkomandazzjonijiet ewlenin ser jiġu riflessi fid-diskors annwali dwar l-Istat tar-Reġjuni u l-Bliet fl-Unjoni Ewropea, li għandu jsir mill-President tal-Kumitat Ewropew tar-Reġjuni, Vasco Alves Cordeiro, fis-sessjoni plenarja ta’ Ottubru 2022.

Ir-rapport ta’ din is-sena jiffoka fuq l-aktar sfidi urġenti li qed jiffaċċjaw il-bliet u r-reġjuni tal-UE: il-konsegwenzi ekonomiċi u soċjali tal-gwerra tar-Russja kontra l-Ukrajna, l-effetti dejjiema tal-pandemija tal-COVID-19 u l-irkupru meħtieġ, l-emerġenza klimatika u t-tranżizzjoni enerġetika, il-ġlieda kontra l-inugwaljanzi, u l-futur tad-demokrazija, fid-dawl tal-konklużjonijiet tal-Konferenza dwar il-Futur tal-Ewropa.

Ir-rapport se jinkludi wkoll il-“Barometru Reġjonali u Lokali” tiegħu, li jippreżenta l-fehmiet tar-rappreżentanti eletti mill-Ewropa kollha mistħarrġa fi sħubija mal-IPSOS.

Barometru Reġjonali u Lokali

Fis-27 Stat Membru tal-Unjoni Ewropea, hemm aktar minn miljun politiku elett fil-livell sottonazzjonali. Dawn il-politiċi lokali jirrappreżentaw ġabra varjata ħafna ta’ kostitwenzi f’diversi livelli ta’ gvern, inklużi stati federali, reġjuni, provinċji, kontej, distretti jew muniċipalitajiet. L-istħarriġ tal-Ewrobarometru Flash jipprovdi pjattaforma importanti għall-politiċi lokali fl-UE biex jaqsmu l-opinjoni tagħhom dwar l-isfidi u l-prijoritajiet tal-Ewropa.

It-tweġibiet jiżvelaw il-kwistjonijiet li l-politiċi lokali jqisu bħala prijoritarji fil-livell tal-UE, il-livell ta’ għarfien tagħhom dwar l-inizjattivi fl-UE u l-opportunitajiet ta’ finanzjament tal-UE, l-opinjonijiet tagħhom dwar il-futur tal-Ewropa, u r-reazzjonijiet tagħhom għall-emerġenza maħluqa mill-gwerra fl-Ukrajna.

Sejbiet ewlenin 

• 76 % tal-politiċi lokali qalu li l-awtorità reġjonali jew lokali tagħhom tilqa’ refuġjati mill-Ukrajna, u mill-inqas nofs dawk li wieġbu qalu li l-awtorità reġjonali jew lokali tagħhom tibgħat għajnuna materjali lill-Ukrajna.
• Tnejn minn kull erba’ rispondenti qalu li l-aktar mod effettiv biex terġa’ tinbena l-Ukrajna huwa li r-reġjuni tal-UE jiġu involuti fil-pjan ta’ rikostruzzjoni.
• 88 % tal-politiċi lokali intervistati qablu totalment jew pjuttost qablu li l-“koeżjoni” għandha tkun fost il-valuri ewlenin tal-Unjoni Ewropea; din iċ-ċifra varjat minn 68 % fil-Finlandja għal 100 % fil-Portugall.
• Fir-rigward tal-mistoqsija dwar il-valur miżjud tal-politika ta’ koeżjoni, meta mqabbla ma’ flussi oħra ta’ finanzjament (nazzjonali jew reġjonali), aktar minn sitta minn kull għaxar rispondenti qalu li l-fondi ta’ koeżjoni ntużaw biex jappoġġjaw tipi speċifiċi ta’ proġetti (62 %). Kważi wieħed minn kull tliet politiċi lokali qal li l-Fond ta’ Koeżjoni ntuża biex il-politika tal-UE tiġi integrata fl-istrateġiji żviluppati fil-livell reġjonali (31 %), mentri madwar wieħed minn kull ħames rispondenti qal li jappoġġja s-sħubija fost l-atturi fil-livelli istituzzjonali kollha (20 %) u l-istabbiltà tal-finanzjament fit-tul (16 %).
• Fir-rigward tal-għarfien ta’ kwalunkwe finanzjament tal-UE (taħt il-Politika ta’ Koeżjoni jew in-NextGenerationEU) riċevut mill-belt jew ir-reġjun tagħhom f’dawn l-aħħar sentejn, 35 % tal-politiċi lokali qalu li huma konxji ta’ kwalunkwe finanzjament tal-UE.
• Wieħed minn kull għaxar rispondenti ddikjara li kien totalment (1 %) jew parzjalment (9 %) involut fl-abbozzar tal-Pjani Nazzjonali għall-Irkupru u r-Reżiljenza.
• 51 % tar-rispondenti qalu li l-objettivi ewlenin tal-finanzjament tal-UE għandhom ikunu l-appoġġ għat-tranżizzjoni ekoloġika tal-ekonomija.
• 77 % tar-rispondenti qalu li l-impatt soċjali u ekonomiku tal-gwerra jirrikjedi l-adattament tal-politiki u l-finanzjament tal-UE.
• 89 % tar-rispondenti jaqblu li r-reġjuni u l-bliet għandu jkollhom aktar influwenza fuq il-futur tal-Unjoni Ewropea.
• Aktar minn sitta minn kull għaxar rispondenti (65%) qalu li r-reġjuni u l-bliet jistgħu jkunu involuti bl-aktar mod effettiv fid-dibattitu dwar il-futur tal-Ewropa billi jiġi żgurat dibattitu kontinwu dwar is-suġġett fil-livell reġjonali u lokali.

L-istħarriġ dwar il-politiċi lokali tal-UE u l-futur tal-Ewropa twettaq mill-IPSOS. Bejn il-25 ta’ Lulju u l-11 ta’ Settembru 2022, saru 2 698 intervistamal-politiċi lokali u reġjonali fl-UE.