Aistriú mótarfheithiclí: Leagann comhdháil Strasbourg amach tosaíochtaí réigiúnacha do thodhchaí na hearnála

Tá athrú ó bhonn ag teacht ar earnáil mótarfheithiclí na hEorpa, atá á spreagadh ag an aistriú glas agus ag an aistriú digiteach agus atá treisithe ag an iomaíocht dhomhanda agus ag an éagobhsaíocht gheopholaitiúil. Sa chomhthéacs criticiúil sin, d’óstáil Comhghuaillíocht Réigiúin na nGluaisteán (ARA)comhdháil ardleibhéil in Strasbourg an 17 Meitheamh, le linn sheisiún iomlánach Pharlaimint na hEorpa, chun ról na réigiún a threisiú maidir le todhchaí na hearnála a mhúnlú. 

Tionóladh an chomhdháil de réir mar a ullmhaíonn an tAontas a chéad bhuiséad fadtéarmach eile tar éis 2027 agus an beartas comhtháthaithe a bheidh ann amach anseo, dhá rud atá ríthábhachtach chun iomaíochas réigiúnach a áirithiú. Tháinig ceannairí réigiúnacha agus Feisirí de Pharlaimint na hEorpa le chéile chun cur chun feidhme an Phlean Gníomhaíochta do Thionscal Gluaisteán na hEorpa a chur chun cinn agus chun meastóireacht a dhéanamh ar an dul chun cinn a rinneadh ó glacadh an Plean. Is suíomh straitéiseach é Réigiún Grand Est na Fraince, óstach na comhdhála agus an chéad chathaoirleach eile ar ARA, mar mhol mór táirgeachta i dtionscal gluaisteán na Fraince, le 117,000 post tionsclaíoch scaipthe ar fud 2,300 saoráid. 

Bhí sé d’aidhm ag plé na comhdhála soiléiriú a dhéanamh ar ábhar agus amlíne na bpríomh-gharspriocanna reachtacha atá ar na bacáin i dtreo chur chun feidhme an Phlean Gníomhaíochta seo, lena dtairgtear ardán do réigiúin chun uirlisí praiticiúla, dúshláin agus dul chun cinn a chomhroinnt, agus béim ar leith á leagan ar fhostaíocht, scileanna agus nuálaíocht. Chuir ceannairí réigiúnacha idirghabhálacha spriocdhírithe i láthair ina léirítear an chaoi a bhfuil gach colún den Phlean á chur i ngníomh go háitiúil, ó bhonneagar leictrea-shoghluaisteachta a imscaradh go tacaíocht a thabhairt do sholáthróirí FBManna chun cumais táirgthe a chur chun cinn. D’iarr siad go dtabharfaí tacaíocht mhéadaithe ón Aontas do chomhpháirtíochtaí oiliúna trasteorann, do chláir cháilíochta nua, agus do chomhar níos láidre idir údaráis phoiblí agus an tionscal chun riachtanais scileanna amach anseo a réamh-mheas. 

Leag siad béim freisin ar an ngá atá le cistiú um aistriú do réigiúin atá ag brath go mór ar thionscal na ngluaisteán. I gcomhthéacs níos leithne na n-iarrachtaí chun todhchaí an bheartais chomhtháthaithe a chosaint agus ról na réigiún maidir le beartais an Aontais a chur chun feidhme, leag siad béim ar an tacaíocht a thugann na réigiúin don chlaochlú tionsclaíoch — go háirithe trí éiceachórais nuálaíochta, agus trí bheartais thionsclaíocha agus soghluaisteachta a fhorbairt. Beidh cur chuige áitbhunaithe difreáilte lena gcuirtear san áireamh dúshláin shonracha na slabhraí luacha réigiúnacha le húdaráis áitiúla agus réigiúnacha mar chomhpháirtithe straitéiseacha ríthábhachtach chun aistriú rathúil cóir a bhaint amach. 

Chuir ceannairí réigiúnacha in iúl freisin go bhfuil gá le cur chuige atá neodrach ó thaobh na teicneolaíochta de i leith an aistrithe, agus an leictriú ina chroílár, agus le treoir níos soiléire ón Aontas maidir le soláthar poiblí agus straitéisí athnuachana flíteanna, atá ríthábhachtach chun a chur ar chumas na réigiún dea-shampla a thabhairt san aistriú chuig an tsoghluaisteacht ghlan. 

Úsáidfear na malartuithe sin mar bhonn don obair a dhéanfar roimh Chomhdháil Bhliantúil München ARA i mí Mheán Fómhair agus i dtreo theachtaireachtaí a Dearbhaithe. 

Sleachta

Guido Guidesi, Cathaoirleach ARA agus Aire Réigiúnach Forbartha Eacnamaíche na Lombairde: “Tugaimid dár n-aire go dearfach inniu aontacht na Réigiún maidir le prionsabal na ‘neodrachta teicneolaíche’. Tá sé tábhachtach freisin go n-iarrfaí go comhpháirteach go mbeadh na réigiúin rannpháirteach ar bhealach níos fearr sa Phlean Gníomhaíochta um Fheithiclí, agus go n-athdhearbhófaí freisin gur cúis mhór imní é staid na hearnála ar an leibhéal Eorpach. Ní mór athruithe a dhéanamh láithreach bonn mar gheall ar an staid sin!” 

Franck Leroy, Uachtarán réigiún Grand Est agus Leas-Uachtarán ARA: ‘In Strasbourg, sheol na Réigiúin glao gan débhrí: chun go n-éireoidh le haistriú thionscal na ngluaisteán, ní mór an tAontas Eorpach a shlógadh go diongbháilte. Táimid ag obair go dian cheana féin ar an láthair – ag tacú le fochonraitheoirí, ag cur oiliúint ar ghairmeacha na todhchaí, ag infheistiú i dteicneolaíochtaí ísealcharbóin. Ach tá na dúshláin suntasach, agus ní féidir linn aghaidh a thabhairt orthu ina n-aonar. Ní mór don Eoraip dlús a chur leis an ngiar anois, trína tionscal a chosaint ar iomaíocht atá ag éirí níos ionsaithí de réir a chéile, agus trí thacú le gnólachtaí aistriú atá cothrom, praiticiúil agus fréamhaithe sna réigiúin.’ 

Oliver Schenk (DE/PPE), Feisire de Pharlaimint na hEorpa: “Tá todhchaí na hEorpa á múnlú ag an gclaochlú tionsclaíoch — le haghaidh post, réigiún agus comhtháthú sóisialta. Tá soiléireacht pholaitiúil, misneach straitéiseach agus dlúthpháirtíocht leis na réigiúin de dhíth orainn anois. Tá ár gcuspóir soiléir: ní lú, ach neart tionsclaíoch níos mó san Eoraip.’ 

Cúlra

• Grianghraif ón gcomhdháil.  

• Thug na rannpháirtithe cuairt ar shuíomh tionsclaíoch Schaeffler France. Is ceannaire domhanda é Schaeffler Group i dteicneolaíocht gluaisne a thairgeann réitigh nuálacha agus inbhuanaithe, ó chórais imthacaí go soghluaisteacht leictreach agus fuinneamh in-athnuaite, ar feadh shaolré iomlán an táirge.  

• Is tionscnamh de chuid Choiste Eorpach na Réigiún é Comhaontas Réigiúin na nGluaisteán, ina bhfuil 38 réigiún rannpháirteacha, ina n-aithnítear an gá atá le gníomhaíocht chinntitheach chun spriocanna aeráide an Aontais a bhaint amach. Is é is aidhm dó réigiúin ina bhfuil earnáil láidir mótarfheithiclí a thabhairt le chéile ar mian leo ról gníomhach a bheith acu i ndícharbónú na hearnála iompair agus rannchuidiú le spriocanna an Chomhaontaithe Ghlais don Eoraip a bhaint amach, chun aistriú cóir a áirithiú do réigiúin mótarfheithiclí. 

• Glacadh ‘DearbhúMonza’le linn thionól ARA i mí na Samhna 2024. 

• An 5 Márta, thíolaic an Coimisiún Eorpach an Plean Gníomhaíochta Tionsclaíoch d’earnáil mótarfheithiclí na hEorpa. An 1 Aibreán, ghlac CnaR rún práinneach maidir leis an ngné chríochach a neartú i gcur chun feidhme an Phlean Thionsclaíoch d’Earnáil Gluaisteán na hEorpa ina n-iarrtar cur chuige críochach níos láidre i gcur chun feidhme Phlean Gníomhaíochta Tionsclaíoch an Choimisiúin Eorpaigh d’earnáil mótarfheithiclí na hEorpa (preaseisiúint).  

• Achoimre ó AS GROW maidir le ‘Mapping the impact of industrial decline on European regions’ [Tionchar an mheatha thionsclaíoch ar réigiúin na hEorpa a mhapáil]. 

• Staidéar ó CnaR maidir le ‘Staid na himeartha agus dúshláin na réigiún gluaisteán amach anseo’. 

Teagmháil

Hélène Dressen
Teil.: +32 471502795
Helene.dressen@cor.europa.eu